Dili ko gusto

Usa ko ka amiga akong gipangutana: “Miga” unsa man ang imong FB Account?” Ang yano niyang tubag: “Ay sorry jud Father kay dili man ko at home nianang Social Networking. Dili ko gusto.” Hinuon, nituo pud gyud ko sa iyang gipanulti sanglit ako mang nakita nga bisan siya higalaon kaayo apan buot lang gyud niya nga mohimo niini sa iyang kaugalingong yano nga paagi.

Maayo baya ang facebook ug gani gikinahanglan kini aron mas madugtong nato ang atong mga kahigalaan o mahal sa kinabuhi nga tua na sa layo pinaagi sa pag-add kanila diha sa laray sa atong mga friends. Dugang pa, bisan pa man virtual ang komunikasyon, apan makahatag kini og kahupayan niadtong buot magpahungaw o kaha magpakitambag pinaagi sa chat. Ginamit niining maong teknolohiya, nahimong mas dali ang pakigsuod. Hinuon, dili ikalimod nga dunay mga binuang. Kay bisan unsa kaanindot sa teknolohiya ang tawo ra man gyud ang magbinuang.

Diha sa kinabuhi sa tawo ang kahingpitan nagasukad sa kalambigitan ug komunikasyon. Mao nga usa sa mga maanindot nga aghat niadtong nakasinati og depression gumikan sa bisan unsang rason, ang gikinahanglan mogawas gyud sa panimalay, mosuroy ug makigkukabildo ug mopagawas sa bisan unsa nga ilang gibati. Kay ang pagpadayag sa imong kaugalingong gibati bisan sakit, maoy sinugdanan sa imong kaayohan. Ang Facebook nagpahinumdom kanako kun unsa kaayo ang dunay mga higala apan sa laing bahin, kini usab ang nagpahinumdom kanako nga ang kinabuhi sa pakiglambigit usab diay brutal. Mora’g in a relationship but complicated.