Asa na ang Tuwid na Landas?

Ang Parokya sa Putli nga Kasingkasing ni Maria (Immaculate Heart of Mary) sa lungsod sa Minglanilla mihingusog sa kampanya niini pag-abag sa mga kabus nga mga lumolupyo sa lungsod nga makaangkon og panginabuhian.

Kining maong programa nga gihingusgan ni Fr. Jojo Deligero, team moderator sa parokya, ug sa mga pribadong indibidwal sama sa negosyanteng si Lumen Selma-Cañdedo.

Kasagaran sa mga benepisyaryo sa maong programa mga kababayen-an. Hinuon adunay pipila ka mga lalaki.

Unang hut-ong sa maong programa mao ang pagpa-ubos nila og “values formation.” Human niini, ang mga benepisyaryo sa programa ipa-ubos og nagkalainlaing livelihood training.

Kagahapon, gitigum nilang Fr. Jojo ug Mam Lumen ang mga benepisyaryo aron papilion unsa nga klaseng proyekto ang mahimo nilang negosyo sa umaabot pinaagi sa ipahulman unya nga puhonan gikan sa parokya.

Miabag usab ang programa ang Franciscan Friars of Charity nga anaa magbase sa maong lungsod.

Ang maong proyekto nga gihingusgan ni Fr. Jojo ug sa mga kaubanan niyang kaparian sa parokya usa lamang kini sa mga proyekto alang sa mga parokyano niini.

Ang Simbahan sa Minglanilla nalambigit usab sa community organizing alang sa mga tawo sa barangay Cadulawan pag-abag sa mga mag-uuma sa barangay aron molambo ang ilang pagpuyo. (Sumala sa gihisgutan sa miagi natong Tikdol).

Sa umaabot natong lindog, atong hisgutan ang kalambuan sa mga programa sa Parokya aron kapanaminan sa ubang organisasyon ug komunidad.

Si Obispo Broderick Pabillo ang chairman sa Catholic Bishops’ Conference of the Philippines National Secretariat for Social Action—Justice and Peace (CBCP-NASSA-JP) gipadayag sa kasagmuyo sa administrasyong Aquino tungod sa mga desisyon niining, matud pa sa obispo sa Manila, mipabor sa mga gamhanan (powerful) ug dili sa mga kabus.

Si Pabillo nakasaway sa desisyon sa pamunoan ni Aquino tungod sa pagpabor niini sa plano sa Philippine Airlines (PAL) nga modangop sa “outsourcing” nga miresulta sa pag-layoff sa 2,600 ka mga ground personnel sa maong airlines.

Laing nakit-an sa obispo ang baruganan ni Presidente Noynoy Aquino sa isyu sa Hacienda Luisita nga hangtod karon ang mga pordoy’s mag-uuma ang pirmeng alkanse.

Kun anaa pa sa akong atubangan si Pabillo, ako siyang ingnon nga daghan na kaming nakabantay nga ang administrasyon ni Aquino pabor sa mga adunahang gamhanan, ug dili sa mga kabus.

Ug akong ingnon si Pabillo nga natural kini nga balos ni Noynoy sa mga tawo nga nakatabang niya sa miaging presidential election.

Sumala sa atong tinubdan, si Lucio Tan sekretong mihatag og hinabang sa kampanya ni Noynoy sa miaging eleksiyon.

Apan bisan pa, asa naman diay ang kaluoy sa gobyerno sa mga pordoy’ng trabahante?

Kitang mga trabahante human na alkanseha sa pag-uyon sa gobyerno sa “contractualization.” Alang sa mga nalimot, kining contractualization napasar kini sa Kongreso tungod sa pagpangusog ni kanhi Senador Ernesto Herrera.

Bisan si Herrera naila ug giila nga trade union leader, naka-ako siya sa pagduso sa contractualization ug sa dihang napasar na kini, wala nay “security of tenure” ang mga empleyado sa mga pribadong establisamento.

* * *

Apan hain naman ang gipanghambog ni Noynoy nga “Tuwid na Landas”? Unsa man na nga “landas”, paingon sa mga adunahan ug gamhanan?

Aduna ba siya’y “landas” alang sa mga kabus? Sa mga drayber? Mga gagmay’ng negosyante sa kamerkadohan nga kanunay’ng panggukdon sa mga demolition team? Ug sa mga mag-uuma sa humayan nga walay konkretong tabang kay ang gitabangan mao ang mga Insik nga mga negosyante paggamit sa legalize smuggling sa bugas humay pinaagi sa National Food Authority?

Kun dili magtinarong si Noynoy niining iyang Tuwid na Landas nga iya lamang gigamit isip “cover” sa huyang niyang pangagamhanan, mahuman ang iyang termino isip presidente ibabaw sa pagkondenar ug pagsaway sa katawhan.

Ug kun mahitabo man nga mahimo siyang “unpopular” sa dili pa mapupos iyang termino tungod sa pagkalikoon sa iyang “Tuwid na Landas”, dautan kining tilimad-on nga iya lamang gidaot ang mga ngalan sa iyang mga ginikanan – si anhing Sen. Ninoy Aquino Jr. ug anhing Presidente Cory Aquino.

Kitang mga Pilipino magbantay unsay mga lihok sa atong presidente gamit ang iyang Tuwid na Landas. Kay basin unya og magmata na lamang kita og buntag – nagsige kita og tuo nga tinarong ang maong programa, apan gihimo diay kini aron matabunan ang mga binuang ug mga hinanggaw nga desisyon, sama nianang pag-uyon sa outsourcing sa PAL.