Oplan Hagibis fight g'yud!

Kun molihok lang g’yud lagi masulbad ra ang problema kabahin sa kasamok nga mugna sa mga “habal-habal” drivers nga kaniadto anha magsaoy-saoy pagpamasahero sa gitawag og JY Square sa Lahug.

Apan gikuyawan ko kay basin og karon lang kini mopakita og hilas ang mga sakop sa Oplan Hagibis aron paghapsay sa karsada diri sa rotunda sa Gorordo Avenue ug Salinas Drive.

Hinuon, ang tanan magdepende ra man g’yud sa mayor. Pananglit ang mayor magduka-duka ug makalimot na pagsuperbisar sa iyang mga sakop, ang mga sakop sa Oplan Hagibis magligoy ra usab.

Aw hinuon, ako maoy magsilbi nga “eyes and ear” ni City Administrator Jose Mari Poblete, ang akong higala nga maoy chairman sa Oplan Hagibis, kay matag adlaw dia man ko mag-agian sa gitawag og JY Square.

Pasabton nako ang mga habal-habal drayber nga ang tumong sa mga opisyal sa dakbayan dili kay kulban mo’s kaldero. Makahimo gihapon kamo sa pagpadayon pagpamasahero pinaagi sa gitawag og “habal-habal” apan kontrolahon lang ang inyong mga lihok kay daghan na man gud ninyo ang wala na’y tahud sa balaud.

Ako isip law enforcer sa Land Transportation Office (LTO) makapanglingo-lingo ko nga magtan-aw sa abuso sa inyong kaubanan, apil na sa mga drayber sa mga PUJ nga anha maghuwat og pasahero dapit sa eskena.

Ang uban usab sa mga motorsiklo nga gigamit sa habal-habal wala na’y rehestro, ug ang ubang drayber walay lisensya pagmaneho og sakyanan. Tarung ba gud na? Gawas pa niana, ang inyong mga motor walay mga suga, walay side mirrors ug dili kamo magsul-ob og crash helmets. Angay kamo nga magsul-ob gayud og crash helmets kay proteksyon ra man usab kini sa inyong ulo kun mahitabo nga maaksidente, unya apila pagpasul-ob og helmet ang inyong pasahero.

Mao bitaw nga kun dunay masakpan atul sa operation sa LTO-Task Force Alpha dili gayud kami mopasaylo kay gituyo man ninyo nga kamo madakpan. Balikon nako pagpasabot nga niining milabay’ng mga adlaw, misaludo ko kaninyo nga mga habal-habal drivers nga mituman na sa balaud. Aw klaro hinuon kaayo nga nahimo kini kay nahadlok lang mo nga madakpan.

* * *

Balikon nako pagpahinumdom sa mga drayber nga ipausab g’yud ninyo ang koneksyon sa suga sa gimaneho ninyo nga sakyanan. Kinahanglan nga inigsiga sa suga sa atubangan, mosiga dungan ang suga sa luyo. Hunonga na gud nga duha ka switch ang inyong gigamit alang suga sa atubangan ug lahi usab sa luyo kay ang resulta niana makalimtan ug madakpan na hinoon mo.

Ang uban nga kalapasan nga klaro na g’yud kaayo nga tinuyo mao ang pag-drive nga magsul-ob og sinelas, ang dili pag-uniporme ug ang pagpasirit gihapon pagpadagan bisan og stop na ang signal, ug ang dili pagtuman sa mga traffic signs.

Angay kaha nga kaloy-on kining maong mga drayber? Dia pay lain, alang na kini sa mga tag-iya sa sakyanan. Siguroa nga ang inyong mga sakyanan dunay hand brake kay ang balaud baya naglatid nga “impound” ra ba g’yud ang sakyanan nga wala niini.

Dili ba kamo malooy nga ang drayber maoy madakpan tungod sa inyong kakuwangan? Unya, kamong mga drayber unsay inyong buhaton? Ang maayo ninyo nga buhaton ayaw na pag-drive niining maong mga sakyanan nga walay hand brake aron dili kamo madakpan.