A better experience awaits you!

Mao ni ang atong mabasa sa façade o sa atubangan sa Prince Warehouse sa City Hall. Nunot sa tinguha sa administrasyon ni Mayor Mike Rama pagpatahom sa dakbayan, sa iyang facelifting program, maoy atong namatikdan nga ang business sector, ilabina ang mga mall, naningkamot usab pagpaanindot, pag-renovate ug pag-refurbish sa ilang mga establishments paghatag og convenience sa mga customer.

Mao kini karon ang gihimo sa mga tindahan sa Prince Warehouse, ilabina ang anaa sa city hall. Dugaydugay nakong wa makapamalit sa Prince City Hall, ug nakuratan ko pagsulod nako karong bag-o sa dakung kausaban, fully aircondition na, dili sama sa atong naandan nga usa lamang ka warehouse.

Nagpadayon ang renovation sa second floor, ug mao kini ang ilang giingon nga a better experience awaits you. Atong tan-awon ug huwaton. Unsaon nga matag anha nako sa city hall, pahimuslan na lang nako ang pagpamalit ug banus-banuson nako’g sulod ang La Nueva ug Prince Warehouse. Ug sa Prince City Hall diay, naay ilang mga kan-anan nga limpiyo, maayong mangluto, ug barato pa gyud.

Ug bahin sa beautification sa Don Sergio Osmeña Avenue (Jones Ave.), iapil usab unta nila ang pag-beautify sa mga sidewalk, ilabina na sa may Fuente Osmeña, diin daghang makililimos, kasagaran mga bata, ang mokalit lag pangablit nimo, ang uban manghigda sa hagdanan sa flyover, ug ang ubang mga istambay, anha mangatulog sa sidewalk. Unya, sugaton dayon kag manindahay og mga condom, bisag wa pay klaro kun mahimo na bang balaud ang RH Bill ni Noynoy.

Mora’g inhuman kaayong hunahunaon nga mahimong eyesore ang mga bata, mga inahan nga magkugos sa masuso nilang mga anak. 

* * *

Mora’g nawingig na kuno ang justice system sa America. Pipila ka Amerikanhon mipalanog sa ilang katingala ug pagsaway sa ilang justice system, tapus ang usa ka inahan na-convicted gumikan sa pagkamatay sa iyang anak nga naligsan paglabang nila sa dalan.

Matud dinhi, ang inahan was convicted for jaywalking after her 4-year old son was run over and killed in a hit and run incident. Homicide ang conviction, bilanggo sulod sa upat ka tuig.

Ang Internet wa man maghisgot kun unsay nahitabo sa nakaligis nga nakainom kono, sa ato pa, mas dakug sala ang inahan for jaywalking, kay sa nakaligis nga hubog.

Gawas nga namatyan siya’g anak, na-priso pa gyud siya ug nahilayo sa laing duha niya ka gagmay’ng anak. Di ka maglibog ini, Dro?