EDITORYAL - Taga south district nagpaniid

Ang mga molupyo sa habagatang distrito sa dakbayan sa Sugbo nagpaniid baya tinuod unsay mga proyekto karon ni Kongresista Tomas Osmeña sa maong   lugar sud sa kapin tuig na niyang lingkod sa katungdanan.

Kay lahi man sa panahon ni kanhi Kongresista Antonio Cuenco nga may mga proyekto siyang matumbok dayon kun pangitaan siya sa katawhan.

Karon mas arang-arang kay ang nakahimo og pintok nga pagpaningil mao pa si Mayor Michael Rama kay nagkabingkil man sila, pero kun wa pa,   aw wa kaayo’y makasukit kang Osmeña hain na ang P70 milyones niyang budget    para sa iyang distrito sa unang tuig niyang serbisyo.

Apan nagtuo ang kadaghanan nga gipugngan pa kini ni Osmeña karong pundoha ug unya na kini ipabuhagay sa maghinangat na ang eleksyon kay aron makabomba siya og maayo batok kang Rama inig-abot sa maong higayon.

Ang matag kapitan sa barangay sa south district nagtuo nga ang gihandos nilang mga proyektong gastoanan sa pork barrel ni Osmeña di mabalibaran sa   naulahi tungod kay mao ra man kana ang bugtong puhonan sa usa ka politiko aron makapanukad sila og maayo sa pagpabarug sa ilang kampanya kun mokandidato pa sila sa umaabot nga eleksyon.

Apan labaw sa tanan kun gipadaog man si Osmeña sa katawhan sa south district , kana tungod kay nagtuo sila nga mas daghan kini og mahimo kay sa iyang kaatbang kaniadto nga si Atan Guardo.

Ang peligro kun matapos nalang ang iyang termino unya wa siyay masugdan nga proyekto sa iyang distrito, tataw kaayo nga mohungaw ang   gilauman sa katawhan gikan kaniya. Di ba?