Bag-ong membro sa pamilya

Duha sa mga pildirong kandidato pagkasenador ubos sa ticket ni Presidente Benigno Aquino niadtong 2010 elections ang nadugang sa iyang opisyal nga pamilya sa Malakanyang.

Ang duha mao sila si Nereus Acosta nga gitudlo isip presidential adviser on environmental concerns ug si kanhi Muntinlupa City congressman Rufino “Ruffy” Biazon.

Si Acosta nanumpa na sa katungdanan niadtong Miyerkules samtang si Biazon mao ni ang gipaabot nga mohulip ni Commissioner Angelito Alvarez sa Bureau of Customs. Wala hinuon hingpit ipahibawo sa Malakanyang ang appointment ni Biazon.

Dugay na unta angayang hulipan si Alvarez sa customs tungod kay wa ni’y nahimo pagpakgang sa smuggling dinhi sa nasud labi pa gyud didto sa kaulohan.

Kamatuoran niini mao ang pagkahanaw sa 1,910 ka mga container vans samtang gi-transship gikan sa Manila paingon sa Port of Batangas niadtong tunga-tunga sa Mayo ug Hunyo.

Aron pagsalbar sa iyang kaugalingon sa tulobagon nagdali-dali si Alvarez og pasaka og kaso batok sa mga tawo nga giingong nalambigit sa pagkahanaw sa kargamento.

Ilang gikiha og smuggling atubangan sa Department of Justice ang mga consignee ug ang mga kawani sa brokerage. Wala gyuy bisan usa ka opisyal ug kawani sa customs nga gilakip sa pagkiha.

Imposible mang mahanaw ang maong kargamento og way kakonsabo nga mga opisyal ug kawani sa aduana.

* * *

Angayang palig-unon sa customs dinhi sa Sugbo ang ilang intelligence monitoring tungod kay sigun sa akong tinubdan nagpadayon ang kalihukan sa mga negosyanteng mapahimuslanon.

Ang modus mao nga adto idunggo ang ilang kontrabando sa Mindanao ug dad-on ang kargamento dinhi sa Sugbo luwan sa local nga mga barko aron paglipat sa mga awtoridad.

Sigun sa tinubdan sagad sa mga tawo nga nagpaluyo niini mga negosyante ra pud nga dia sa Sugbo, gani ang uban niini giingong naghupot pa og pwesto sa kagamhanan samtang dunay uban nga lig-on og koneksiyon sa impluwensiyadong politiko sa Sugbo sanglit nahimo siyang opisyal gyud sa dakbayan kaniadto.

Tungod kay anad man siya’g pangabogar sa nagsilbi pa siya sa dakbayan, karon sab ang iyang trabaho ang pagpangabogar sa mga nalambigit sa illegal nga kalihukan.

Busa akong hagit sa bag-ong pangulo sa intelligence service sa customs dinhi sa Sugbo kinahanglang alisto ug bawal ang magpunay og katulog sa pansitan.

* * *

[email protected]