Ngano mang dili man kita?

Ang matag kasinatian dunay tumong kun nganong sination sa usa ka tawo. Mahimong kini ingon nga usa ka pagtulon-an aron sarang kapanaminan sa umaabot nga mga adlaw. Dili garantiya ang pagbinuotan ingon man ang pagtinarong aron makaingon ka nga molungtad ang usa ka relasyon. Mao nga husto gyud ang pangutana: “Nganong dili man kita?” Dili gyud permanente ang kinabuhi sanglit ang permanente ning kalibutana mao ra man ang kausaban.

Daghan sa mga relasyon ang naungkag gumikan kay napul-an dili ba kaha gilad-an. Mao nga lisud tugkaron usahay ang kahulogan sa goodbyes are not forever sanglit, bisan dili na kamo, padayon gihapong mourom sa imong handurawan ang mga makabuhing kasinatian nga naghatag og kahulogan sa imong kinabuhi.

Gipaambit ko kini agi’g pagpahinumdom nga ang kinabuhi dili sa tanang higayon patas ug tam-is. Brutal kaayo kini. Dunay malipay, dunay maguol. Dunay buot mabuhi, dunay buot magpakamatay na lang. Dunay puno, dunay haw-ang. Apan bisan pa man kun biyaan ka sa kadaghanan hinumdomi nga dunay mabilin gihapon kanimo. Kini ang naglangkob sa imong kaugalingon ug sa imong Dios.