Reward money, donasyon ug disgrasya

Mohatag og 50 mil ka pesos nga pahalipay ang Task Force Ellah Joy niadtong makahatag og kasayoran kun hain magtago si Bella Ruby Santos, akusado sa pagdagit ug pagpatay kang Ellah Joy Pique. Ang nahisgutang kantidad gitampotampohan sa mga polis sa lalawigan sa Sugbo nga gipangulohan ni Sr. Supt. Patrocinio Comendador Jr.. Sa miaging semana mikabat na og 40 mil ka pesos ang natigum sa Task Force Ellah Joy.

Apan ang gihimo sa Task Force gitugbangan usab kini sa akusado. Pinaagi sa iyang abogado, mihatod og napulo ka sako nga bugas humay ingon man karton sa de lata sa GMA 7 si Bella Ruby Santos aron itabang sa mga nasunogan sa Barangay Carreta ug Tejero ning dakbayan sa Sugbo. Samtang ang laing akusado nga si Ian Charles Griffiths mipahibalo sa paghatag og usa ka gatos ka libo ka pesos alang usab niadtong makahatag og kasayoran alang sa iyang giingon nga tinood gayod nga naghimo sa krimin.     

Sa wala pa mopagawas og warrant of arrest ang hukmanan batok ni Santos ug Griffiths nanghambog si Comendador sa katawhan ug sa kabanay sa biktima nga dili makalighot si Santos sa ilang mga kamot tungod kay kanunay kini nilang gibantayan. Karon nga aduna nay warrant of arrest nga gipagawas ang hukmanan wala na makit-i ni Sr. Supt. Comendador ug mga kaubanang polis si Bella Ruby Santos. Ug kay naglisod na sa pagpangita ug pagtultol sa nahimutangan ni Santos nagpakitabang na sila niadtong mga tawo nga adunay kasayuran sa gitagoan ni Santos pinaagi sa paghaylo og salapi.

Ang pagarpar ni Sr. Supt. Patrocinio Comendador Jr. giboking ni Bella Ruby Santos. Ug sa akong pangagpas murag miabot sa dunggan ni Bella Ruby Santos ang iyang ngisi samtang mabiay-biayon nga nagtan-aw sa dagway ni Comendador nga hangtod karon wala gayod makatultol sa iyang nahimutangan. Porbida, unsa kaha tawon ang paingnan ning kaso sa kamatayon ni Ellah Joy Pique.

* * *

Gilubong na kaniadtong Domingo ang nangamatay sa disgrasya sa lungsod sa Barili. Ang maong nangamatay namatay samtang naghatod og patay human madisgrasya ang dump truck nga ilang gisakyan. Ang driver sa dump truck naluwas ug way tatsa sa iyang panit kay naniguro lang og layat sa truck nga iyang gimaniho ug wala gyod magpahibalo sa nagsinardinas niyang pasahero nga wala na mogana ang prino sa dump truck.

Samtang gilubong ang mga nadisgrasya didto sa Barili laing tulo na usab ka mga tawo ang namatay ug usa ang wala pa igkita human masunog ug malunod ang fast craft nga ilang gisakyan nga gikan sa Bohol paingon dinhi sa Sugbo. Usa sa mga namatay mao ang chiefmate sa barko.

Sa mga disgrasya sa kadalanan ug mga sunog ang kasagaran nga basulon mao si prino ug faulty electrical wiring. Sa nahitabo sa Barili gibasol na nila si prino ug labing seguro ako lang ning pangagpas sa sunog sa barko si faulty electrical wiring na usab ang ilang iduot.