Ang hangyo sa mga Singles for Christ

Karong Domingoha, ako gihangyo sa mga Singles for Christ nga pahatagon og pagpalawom kalabot sa hilisgutan: “Who is Jesus Christ?” Ang initial nako nga reaksiyon mao gyud unta ang pagdumili dili tungod kay wala koy ikasulti apan ako mismo ang wala pa gyud makombinse nga nailhan nako sa mas halawom nga paagi ang atong Ginoo. Sa laktod, kuwang pa gyud ko sa pagsinati kaniya mismo sa akong kinabuhi. Apan bisan pa sa maong kakulangan gipangahasan ko gyud ang pagbatbat niini ginamit ning ebanghelyo nato karong Domingoha nga naglambigit sa Basic Christology.

Ang panahom sa kinabag-an ang naghulagway kang Jesus segun sa ilang nakita ug nadungog o nasaksihan ba hinuon mahitungod kaniya. Mao nga nilutaw ang mga paghulagway nga siya mao si Elias, Juan Magbubunyag ug uban pa. Apan kang Pedro mao kadto ang Personal nga Panahom nga nagasukad usab sa iyang personal nga kasinatian sa iyang magtutudlo. Sa laing bahin ang maong magtutudlo ang nihimo usab og personal nga pagsangon ngadto kang Pedro sa iyang mahinungdanong tahas ingon nga pangulo sa ilang kahugpongan taliwala sa iyang pagka-siya.

Mao nga ang kinabuhi diha ni Cristo ang nagasukad dili lang sa pag-ila kaniya ginamit ang salabutan kundili usab diha sa pagsinati kaniya pinaagi sa makanunayong pakighinabi kaniya diha sa pag-ampo.