TARWASA sa Tapilon

Nakadungog ko nga dunay mga taga barangay Tapilon, Daanbantayan nga giputlan og koneksyon sa tubig kay wala mobayad direkta ngadto sa mga opisyal sa barangay nga gitugyanan ni Daanbantayan Mayor Malou Loot pagdumala sa water project.

Nangutana ko ni Claro Benatiro nga maoy chairman sa Tapilon Rural Waterworks Sanitation Association (TARWASA) ug gitug-anan ko niya nga tinuod nga dunay mga konsumidor og tubig nga wala mamayad sa mga opisyal sa barangay kay giisip nila nga illegal ang ilang pagdumala sa water project. Si Mayor Loot diay maoy nagtudlo sa mga opisyal sa barangay Tapilon nga mao ang modumala sa water system nga iya sa TARWASA. Nahibulong si Claro kun nganong naingon man kini niini?

Ang korte sa Bogo dunay “status quo” order nga giluwatan nga nagpasabot nga dili usa hilabtan ang water system samtang wala pa maresolbar ang kaso nga pending pa sa hukmanan.

Gikiha sa TARWASA si Mayor Loot tungod sa pagpasirado niya sa water4 system kaniadtong Abril bisan ug duna pay status quo order. Naninguha ko nga makapangayo ug contact numbers ni Mayor Loot aron maklaro ni. Unya, angay na tingali nga paspasan sa huwes nga nadistino sa Regional Trial Court (RTC) sa Bogo ang paghusay sa maong kaso nga naglambigit sa TARWASA kay daghan ang apektado niini.

Nakasabut ko sa sentimento sa mga konsumidor sa TARWASA nga kun mobayad sila sa mga opisyal sa barangay nga tinudlo ni Mayor Loot, maisip ra nga miila sila nga legal ang ilang pagkatudlo.

Nagsugod man gud kining maong isyu kay sa sinugdanan nangangkon si Mayor Loot nga may katungod ang munisipyo sa Daanbantayan pag-isyu og business permit sa TARWASA ug kay wala man sila mokuha’g permit, iyang gipasirad-an.

Apan ang chairman sa Local Water Utilities Administration (LWUA) nga si Daniel Landingin mitataw man g’yud nga ubos sa balaud ang mga waterworks system dili na angay’ng mokuha’g business permit ug mobayad og buhis sa lungsud diin kini mag-operate.

Balikon nako, kun malangan pa kining maong isyu pagkasulbad, basin modaku pa kining maong kaso nga lisud na hinoong sulbaron.

* * *

Gitataw ni Kongresista Tomas R. Osmeña nga dili tinuod nga iya na nga giendosar si Konsehal Rodrigo “Bebot” Abellanosa nga maoy kandidato sa Bando Osmeña Pundok-Kauswagan (BOPK) diha sa South district sa eleksyon karong 2013.

Duna man go’y mitambong sa tigum sa mga konsehal nga tingali wala lang kaayo makasabot sa punto sa mayor. Matud ni Tommy nga akong nakontak, ang iyang giingon mao nga angay’ng panaminan sa mga konsehal ug opisyal sa barangay ang kaagi ni Abellanosa.

Si Abellanosa kaniadto kapitan sa Duljo-Fatima apan dihang milansar kini pagka konsehal sa dakbayan ubos sa han-ay sa BOPK midaug kini og nahimong konsehal sa dakbayan.

Karon, gihulagway ni Tommy nga si Bebot usa sa posibleng “humot” kaayo nga kandidato pagka kongresista diha sa South district. Apan sa klaro nga pagkasulti sayop ang report nga giendosar ni Tommy si Bebot nga maoy sunod nga kandidato sa pagka kongresista. Bitaw, maayo si Bebot kay mitrabaho g’yud sa iyang pagka konsehal. Kanunay siya nga mosalmot pagdiskutir sa isyu nga tukion diha sa konseho sa dakbayan.