EDITORYAL - Si PNoy ug ang RH Bill

Ang pagbutang ni Presidente Noynoy Aquino sa Reproductive Health Bill sa priority list sa mga mahinungdanong balaudnon nga angay unahon pagtuki   sa mga magbabalaod aron kaaprobahan sa ikatulong pagbasa luyo sa daghang mga pagpugong nga di angayang hatagan og gibug-aton ang maong balaudnon, maisip nga usa ka inisog nga pakig-atubang niya sa dakong hagit ug hulga sa iyang pagkapangulo sa nasud nga way gidapigan.

Kini nunot sa daghan kaayong mga awhag sa mga dagkong lider sa relihiyosong pundok   nga maoy migawong sa ubang mga magbabalaod ug nag-awhag sa pamuno nasud nga isalindot sa daplin ang RH Bill tungod kay daghang nabalaka nga kun maaprobahan kini sa pagkabalaod apektohan ang panginabuhi sa ubang mga lider relihiyoso.

Apan luyo niining tanan nakita sa mga Pilipino nga wa magpagawong si PNoy sa mga gamhanang   lider sa relihiyon nga misupak   sa pagpasar ning maong balaodnon.

Tungod kay iyang   gituman ang iyang sagradong   katungdanan nga di siya presidente nga pabor sa usa   ka relihiyon kundi alang sa tanang mga Pilipino.

Gitugyan sa pamuno nasud ang gahom sa pagdesider sa maong balaodnon ngadto sa mga magbabalaod nga maoy gipiyalan sa nasud sa pagdiskuti sa mga butang nga may labot sa pagpuyo, pagtuo, pangrelihiyon sa matag Pilipino.

Diha sa mga magbabalaod naglabi ug   mayoridad    kanila nga anaa sa usa ka pundok sa relihiyon nga supak sa RH Bill.

Apan gumikan kay ang ilang  katungdanan mao man ang pagpabarug sa mga katarungan kalabot sa kaayohan ug di kaayohang idulot sa RH Bill segun sa nakat-onan nila sa ilang kaugalingong panabot, pagpananukiduki ug mga paniid, diha nato masud-ong nga managlahi ang ilang baroganan niining maong balaodnon.

Busa alang kang PNoy angay isandig ang tanan sa gitawag nga majority wins aron masuta ang kahinlo sa balaod nga molusot taliwala managsamang grupo sa usa ka relihiyon   apan managlahi  ang panglangtaw kalabot sa RH Bill . Di   ba?