Ngipon sa anti-smoking ordinance

Daghan kaayo ta’g mga maayong balaud ug mga ordinansa. Apan, subong palandungon nga kasagaran niini, kutob lang sa papel, walay katumanan. It will come out nga nag-usik-usik lang ta pag-sweldo ug pag-maintain sa Kongreso ug sa mga local legislative councils.

Tuod man, ila ang paggama og mga balaud, sa executive department ang pagpatuman niini. Apan, unta maghimo sila’g mga balaud nga sayon tumanon. Daghan kaayo ni, usa na niini mao ang anti-smoking nga national ug local law.

Ato ning nahisgutan dinhi tungod kay didto gud sa Muntinlupa City, ug ang Metropolitan Manila Development Authority (MMDA) mipatuman man niini.

Resulta: sa unang adlaw nilang operation, 138 ka tawo ang nadakpan, gimultahan og P500 matag usa, ang uban, gipatrabaho og walo (8) ka oras nga community service. Sa ato pa, ilang gitauran og ngipon ang ilang anti-smoking ordinance in public places. Mahimo kaha ni dinhi sa ato?

* * *

Nalipay kita nga ang National Irrigation Administration (NIA) nakahunahuna na gyud sa panginahanglan nga ma-self-sufficient ang atong nasud sa bugas, ug dili magsalig sa ubang kanasuran diin kita ang nagtudlo unsaon pag-produce og daghang bugas, o sama sa panahon ni Marcos, mag-export ta’g bugas.

Aduna silay 6-year nga irrigation program. Sa ato pa, pinaagi sa massive irrigation project sa tibuok nasud, ma-self-sufficient na kita sa bugas, at last, sa dili pa matapus ang term ni Noynoy, ubos sa Rice Self-Sufficiency Roadmap (RSSR) program. Hinaut pa unta!

* * *

Taga-Zamboanga nanghawod sa International Math Competition nga gihimo sa miaging Hulyo 18 hangtud 23 didto sa Bali, Indonesia. Si Gene Go, Jr. sa Zamboanga Chong Hua High School miadug og gold medal, samtang si Errol John Suarez, grade V sa Bicol University sa Legapi City, Silver medal ug daghang nadaug nga bronze medals sa ilang kauban sa Philippine Team gikan sa nagkalainlaing tunghaan sa nasud, apan walay sa Sugbo.

Ang maong Math Competition gisalmotan sa mga nasud sa Australia, Brunei, Bulgaria, China, Canada, Cyprus, Hong Kong, Iran, Macau, Malaysia, Mexico, Mongolia, Nepal, Netherland, Taiwan, Thailand, Russia, South Africa, USA, Nigeria, India, Sri Lanka, Singapore, Bangladesh, Korea, Vietnam, Zimbabwe, ug ang host country, Indonesia. Kinsay nag-ingon nga bulok ang Pinoy?