Ang IQ ni Tomas

Gisaway ni kongresista Tomas Osmeña ang IQ ni Mayor Mike Rama human mopagawas og rekomendasyon ang City Attorneys Office nga poyde rang matukod o mahimo sa Kapitolyo ug Fifth Avenue Development Corporation ang Ciudad nga proyekto sa may dapit sa Banilad. Sa akong pagsabot buot ipaabot sa kongresista ngadto kang Mayor Mike Rama nga ubos ang IQ niini ug ang pagka Mayor dili makapataas sa IQ hinuon sa ego.

Ako nagtuo nga ang gisulti sa kongresista nagbasi sa iyang kasinatian. Si Tomas sa wa pa makongresista 15 ka tuig nga nahimong Mayor sa dakbayan sa Sugbo ug sa maong gidugayon wa gyod motaas ang iyang IQ hinuon ang mitaas pagmaayo mao ang iyang ego.

Tan-awa ra ugod ninyo. Sa iyang pagpanaway ni Mike si Tomas misimang. Kay di lagi makapataas sa IQ ang pagka Mayor di wala gyod upod motaas ang IQ ni Tomas. Ina kay ang City Attorneys Office ang sawayon sa kongresista kay maoy nagpagawas sa rekomendasyon si Mike Rama ang iyang gipuntarya.

Kay ngano si Mike Rama ba ugod ang nagtuon ug naghimo sa rekomendasyon sa ciudad nga proyekto? Ang Mayor igo rang mikonsulta sa kasuhito ug kabansay sa balaud sa mga nagtrabaho sa City Attorneys Office busa kun wala man makauyon ang kongresista sa rekomendasyon dapat ang City Attorneys Office ang iyang sawayon ug hinganlan nga ubos og IQ dili si Mike Rama.

Tungod kay 15 ka tuig nga nahimong Mayor sa dakbayan sa Sugbo si Tomas sa wala pa mahimong kongresista tan-awa porbidang taasa sa iyang ego. Nagtuo na ugod si Tomas nga siya ra ang hawod dinhi sa Sugbo.  

Si Mayor Mike Rama dili hambogero hinuon naghimo lang sa iyang trabaho busa wa motaas ang iyang ego. Si Mike Rama abogado ug migradwar sa dili basta-basta nga tunghaan didto sa kaulohan busa dili ikalimod nga daan nang taas ang iyang IQ ug seguro wala na kinahanglana nga kini patas-an pa.

Ning akong lindog karon mura ko’g nahimong tigpamaba ni Mayor Mike Rama pero wa koy laraw nga akong kuhaan sa iyang trabaho si Bosing Carlo Duga-duga, ako lang gipadayag ang akong nabasa ug nakita sa lihok sa duha ka mga protagonista. 

* * *

Sa miaging semana nakadawat ko og reklamo mahitungod sa langay nga pagtrabaho sa oval sa Cebu City Sports Complex nga matud pa gi-award ngadto sa paborito ni Bise Mayor Joy Young nga kontraktor. Hangtod karon ang pagtrabaho sa oval wala pa gyod masugdi. Unsa bay hinungdan sa pagkalangay sa trabaho Vice?