EDITORYAL - Ang pagtak-op sa Tabunok market

Di angay moangka ang mga opisyal sa kagamhanan sa dakbayan sa Talisay batok sa hulga sa mga vendor nga magpakamatay sila sa Tabunok public market.

Kini tungod kay anaa ang gahum sa gobyerno sa pagpatuman sa mga kausaban nga alang sa kaayohan sa kadaghanan ug di kay sa pipila lang.

Kun legal ang pagpatak-op sa merkado sa Tabunok pinaagi sa pagtugot sa korte, aw kinsa may makapugong sa  pagpasira niini.

Kun ang mga vendor nga di gustong motuman sa awhag sa gobyerno, o gustong mopakita sa ilang pagka-rebelde, di sila angayang paminawon sa kagamhanan.

Ang mga opisyal sa kagamhanan sa Talisay wa maghimo   og merkado nga ikaalaot sa kadaghanan, kundi ikaayo sa tanan.

Kun gibalhin man ang merkado ngadto sa Lagtang, usa ka lakang nga gilantaw sa kagamhanan sa maong dakbayan nga mas labing makaayo sa tanan.

Bisan asa pa ibutang ang maong merkado, kun maoy kabubut-on sa nagdumala sa gobyerno sa maong dakbayan, ang tinuod nga lungsoranon angay lang morespeto sa maong desisyon.

Ang Tabunok, layo sa taga San Roque ug Tangke. Kun ibalhin man ngadto sa Lagtang, unsa may rason sa taga San Roque ug Tangke nga masuko sila nga daan naman kanang layo sa ilang lugar.

Kay kinsa ba gyud diay ang nakiglalis ug nakigbatok pag-ayo sa kagamhanan sa Talisay ning pagpabalhin sa merkado ngadto sa Lagtang?

Aw nagpasabot lang nga wa silay gusto nga maninda didto  sa Lagtang ug kinahanglang respetohon sa kagamhanan sa Talisay ang ilang desisyon kay ang angay ibutang didto aron manginabuhi, kadto lang may gusto ug andam nga motahod sa nanagdumala lokal nga kagamhanan sa Talisay. Di ba?