Usa ka adlaw human ang negosyante ug tourism stakeholder nga si Bobby Joseph nanawagan alang sa pagluwat sa katungdanan ni Department of Tourism Secretary Alberto Lim gipahibawo dayon sa Malakanyang ang pag-resign sa kalihim.
Ingon ba niini ka impluwensiyado si Joseph nga dali man ni epekto ang iyang panawagan?
Ang tinuod basi sa akong mga tinubdan mao nga gisubmitir nang daan ni Lim ang iyang resignation didto ni Presidente Aquino sa wala pa mohimo si Joseph sa iyang panawagan dinhi sa Sugbo. Posibling duna nay nakasulti niya nga miluwat si Lim sa katungdanan.
Ambot gusto lang ba gyud kaha siya nga mogawas nga labihan ka impluwensiyado nga misanong dayon si Lim sa iyang panawagan o gusto lang gyud niyang pakauwawan ang kalihim atubangan sa daghang mga bisita gikan sa laing nasud atol sa pagbukas sa MICECON 2011 dinhi sa Sugbo?
Matud sa akong tinubdan way labot ang panawagan ni Joseph sa pagluwat ni Lim tungod kay daan na nga tangtangonon ang maong kalihim. Gani gituyo lang nga gipaabot una nga mahuman ang MICECON usa gipahibawo ang iyang resignation aron dili maguba ang kalihukan.
Sumala pa sa akong tinubdan nga si Lim usa ni sa duha ka mga cabinet secretaries nga gipasabot ni PNoy atol sa usa sa iyang mga pakigpulong nga nagdala kanunay og “bad news.”
Ang laing usa una nang mi-resign, si kanhi DOTC secretary Ping De Jesus. Sa pagluwat ni Lim daghan ang nalipay tungod kay sa tinuod lang wa gyud siya’y hinungdan nga kalihim sa DOT.
Wa gyud siya’y nahimo sa DOT gawas sa pag-usik-usik sa kwarta ug pagdala og kontrobersiya ug kauwawan. Pila may gigasto sa DOT pag-usab sa promotional logo niini nga kinopya pa gyud sa Poland?
Ang epektibo nga promotional slogan nga WOW Philippines gitinguhang hulipan og labihan ka bakya nga PILIPINAS KAY GANDA. Alang nako dugay ra unta siyang angayan miluwat sa katungdanan tungod kay tataw kaayo ang iyang kakuwang og hibangkaagan sa iyang trabaho.
Karun nga wala na si Lim hinaut nga pili-on ni Aquino ang tukmang opisyal nga mohulip sa pwesto. Hinaut nga dili lang ang natampo sa kampanya maoy himuon niyang sukdanan pagpili sa sunod nga DOT secretary.
Nitumaw ra ba ang pangalan sa usa ka advertising executive nga si Ramon Jeminez nga maoy posibling mohulip ni Lim. Kun tinuod nga nagbarog si PNOY sa iyang prinsipyo nga “tuwid na daan” nganong di man niya itudlo si kanhi DOT Secretary Ace Durano sa maong katungdanan?
Way lalis ang maayong pagdumala ni Durano kaniadto sa maong ahensiya.
* * *