Nahiwi na ba ang Tuwid na Landas?

Nag-anam na og lutaw ang akong pagduda nga kining “Tuwid na Landas” ni Pres. Noynoy Aquino gimik lamang kini aron tabonan ang tinuod nga intensiyon paggukod sa administrasyon ni Gloria Arroyo.

Nag-anam na og kahilis akong pagtuo sa pilosopiya sa maong programa. Ang akong bilib ngadto sa “Tuwid na Landas” mahanaw kun tinuod ang akong nadunggan nga gidawat na ni Noynoy ang sekretong pakig-alyado sa mga Garcia sa iyang administrasyon.

Dili ko supak sa pakig-alyado. Kun makahatag kini og kaayuhan sa mga Sugboanon, nganong dili man?

Apan nasayod man ang administrasyong Aquino nga daghang kasong giatubang si Gob. Gwendolyn Garcia nga hangtod karon wala lang gihapon madesisyoni.

Sa mga malimtanon, ang gobernador sa Sugbo gipasakaan og kaso tungod sa kontrobersiyal nga katukoran sa Cebu International Convention Center (CICC), pagpalit sa Balili lot sa Naga, ug “accroachment of legislative function” nga gipasaka ni anhing Bise Gob. Greg Sanchez batok kaniya, gawas sa ubang mga isyu nga wala makaabot sa lamesa sa mga imbestigador sa Ombudsman.

Human sa 2010 nga eleksiyon, nahibaw-an nato nga ang maong mga kaso gipang-forward ngadto sa Malacañang.

Apan karon lang bag-o, adunay nakahunghong kanato nga wala nay interes si Noynoy nga magukod pa sa maong mga kaso si Gwen Garcia.

Ngano man? Tungod ba kay alyado na ang mga Garcia sa iyang administrasyon?

Gawas dinhi sa Sugbo, ang government-owned and controlled corporation nga Government Service Insurance System (GSIS) gika-intapan sa mga miyembro ug pensioners niini tungod sa mga anomaliya sa maong buhatan.

Apan nganong wala naman ma-utingkay ang GSIS?

Makaluluoy kaayo ang mga opisyal sa mga GOCC sama sa Pagcor ug PCSO tungod kay nasentro sa imbestigasyon sa pro-Aquino congress karon.

Apan nakadungog ba gud kamo nga ang GSIS ubos kaniadto ni Winston Garcia, nga igsuon ni Gwen, gi-imbestigar sa mga senador o kongresista?

Sa sinugdanan, tul-id kaayo ang Tuwid na Landas ni Noynoy.

Apan karon, nahiwi na ang Tuwid na Landas.

* * *

Unsa may epekto sa umaabot eleksiyon sa 2013 kun matibuok na ang pagka-alyado ni Gwen sa administrasyon? Tingale, mahimong zona libre ang Sugbo ug walay labanan nga kandidato si Noynoy.

Kinsay makaluluoy? Siyempre, ang mga sakop sa Liberal party dinhi nga naninguha ug nakatabang nga maka-deliver og mga botos alang kang Noynoy sa 2010 nga eleksiyon.

Usa sa matukmod sa daplin ang pamilyang Davide. Kun modagan og balik si Junjun Davide apan ang iparang sa mga Garcia mao ang anak ni Gwen nga si Atty. Cristina Garcia-Frasco apan walay labanan si Noynoy, kinsay modaog sa inyong paminaw?

Daghan hinuon ang nagtuo nga kun ang amahan nga si kanhi Chief Justice Hilario Davide Jr. ang modagan, bisan kinsa pa sa mga Garcia, aduna kini purohan.

Apan magsilbe kaha ang kanhi chief justice kun mamunbon sila sa ikalimang distrito? Ang akong gipasabot mao nga kun pabilin silang kontra sa mga Durano, ang amahan nga Davide makasinati gihapon sa nasinatian sa iyang anak nga napilde lamang tungod sa mga Durano nga mi-solido sa mga Garcia.

Dali ra hinuon sakpan ang stratehiya sa mga Garcia aron dili mapapas sa politikanhong mapa sa Sugbo.

Human sa kamatayon ni Greg Sanchez, si Agnes Magpale ang milingkod nga bise gobernador. Ang anak ni Magpale nga si Aina undersecretary sa Department of Energy nga gidumala sa igsuon sa bise gobernador nga si Secretary Rene Almendras. Si Almendras suod (kay classmate o schoolmate) ni Noynoy sa Ateneo.

Tingale aron dili lisudlisod ang pag-atubang sa bugnong lugaynon sa 2013, ang mga Garcia naninguha nga makabangag sa administrasyon.

Kun mao kini, may purohan pa kaha nga magka-uli ang maayong kabubut-on sa mga Durano ug mga Davide ug mag-abin sa 2013?

Aduna hinuoy mga political observers nga nagkadayon nga kun mag-abin ang mga Davide ug mga Durano batok sa mga Garcia, mapapas na ang mga Garcia sa politikanhong mapa sa Sugbo.

Apan layo-layo pa hinuon ang 2013. Daghan pa kaayo ang mahitabo.