Giawhag ni Mayor Michael Rama ang mga tindera nga gibiktima sa mga kurakut nga sakop sa Squatters Prevention Encroachment Elimination Division (SPEED) nga mobarug sa ilang katungod ug dili mahadlok.
Bitaw, dili ba giingnan ko man kamo nga reklamo g’yud mo kay aron mapitol kining binuang sa maong mga abusadong kawani sa SPEED. Unya, hangtud karon si Noel Artes nga maoy hepe sa SPEED wala pay kalamboan nga nahimo sa iyang gipasalig nga imbistigasyon.
Sugoa kanang imong mga karaang sakop diha Mr. Artes sa paghimo og walay dapig-dapig nga imbistigasyon aron dili maduhigan sa kauwawan ang imong gidumala nga buhatan tungod lang sa pipila ka badlongon mong sakop.
Balikon nako, kamong mga tindera nga gibiktima sa mga kurakut nga sakop sa SPEED, isumbong ang ilang binuhatan pinaagi kanako.
* * *
Husto ang awhag sa usa ka lumolupyo sa Kamagong Extention, barangay Lahug nga angay’ng hawanan sa mga illegal structure ang maong karsada. Ang gipasabot ni Manuel C. Sainz Jr. mao ang mga balay nga anaa gitukod sa daplin sa karsada.
Usahay anha baya ko moagi kun gikan ko sa barangay Lahug unya moadto ko sa Cebu Business Park. Kun anha ko moagi sa Kamagong Street, moabut na ko sa Cebu Business Park sulod lang sa singko segundos. Mas paspas pa kun ang maong karsada ayuhon sa dakbayan sa Sugbo human kini palapdan apan kinahanglang idili ang “overnight parking.” Kun dunay mga sakyanan nga anha iparada daplin sa karsada sa gabii angay gayud kini nga guroyon ug kuhaon sa maong lugar.
Sa matag agi nako sa Kamagong Street nabantayan g’yud tinuod nako nga dunay mga balay nga angay’ng sapsapan kay miabot na sa karsada. Unsaon, ang batasan sa ubang tawo mao ang pagka mapahimuslanon.
* * *
Daghan kaayo og mga consultant si Mayor Michael Rama ug angay sila nga moabag aron masabtan sa mayor ang kinatibuk-ang mga isyu. Miabut kini sa akong huna-huna kay daghan kaayong mga higayon nga dili kompleto ang inpormasyon nga ibutyag sa mayor sa media.
Sama pananglit sa kaso sa dakbayan nga naglambigit ni magpapatigayon Roque Ting nga naningil nga pabayran ang iyang yuta nga naapil sa pag-reclaim sa South Road Properties nga kanhi South Reclamation Project.
Wala makapasabot si Rama kun ngano nga ang kantidad misaka sa kapin sa P9 milyones ang gipangayong bayad ni Ting nga unta P100,000 ra man kuno ang orihinal nga gipabayad ni Ting. Kun gitrabaho pa kini sa iyang mga consultant, dili usab maglibog ang mga reporters.
Palihoka ang imong mga consultant mayor, dili kay mokubra ra sila sa ilang honoraryom nga walay serbisyo.
* * *
Nalipay ko pagkakita nga gihinay-hinayan na sa pagpalawom ang Parian Creek apan tua pa hinoon sila sa bukana nga bahin dapit sa dagat. Kining maong sapa nga sa mapa gihinganlan og “Estero Parian” maoy makaingon sa paglunop dinhi sa downtown area sama sa Manalili kun dunay uwan.
Kay wala pa man nila gub-a ang kabalayan nga anaa gitukod daplin sa maong sapa, gipanguha lang usa nila ang mga lapok. Migamit sila og gakit (raft) aron nga kargahan sa mga lapok ug alsahon paingon sa dump truck nga mohakut sa hugaw.
Arang-arang na lang og gamay kun moabut ang pagpalawom dinhi sa downtown area kay sigurado ko nga makapaminus kini sa paglunop kun dunay uwan.