Kastigo o kiha?

Mao ni ang dakong hagit nga atubangon unya sa mga ginikanan, mga yaya ug mga magtutudlo kiha kun o galing mokastigo sa mga bata. Karong hayag ang posibilidad nga mahimong hingpit nga balaud ang ‘Anti-Corporal Punishment’, mabutang sa dakong hagit ang labing batakang katungod sa mga ginikanan ug mga magtutudlo--- ang pagdisiplina sa mga bata nga maoy siguradong maoy moduma sa sunod nga henerasyon. Dakong sagpa alang sa mga ginikanan ang maong balaudnon nga nagdili kanila sa pagkusi, pagsagpa, pagbunal, paglatigo ug bisan lang pagbahad sa anak nga bunalan kun magpasiaw. 

Katungod sa matag ginikanan o sa mga hamtong ang pagdisiplina sa mga bata ug pagsiguro nga di’ na nila buhaton ang kasaypanan nga ilang nahimo sa ilang kaugalingon o sa mga tawo sa ilang palibot. Apan karon nga nabutang sa hulga ang mismong lakang sa pagdisiplina sa mga bata, kinsa paman ang modisiplina kanila? Daghan ang nag-ingon, ang pagbunal usa ka sayop nga matang sa paghatag og leksyon sa usa ka bata sa kasaypanan nga iyang nahimo. Ang pangutana, unsa man diay ang tukmang paagi? Dili perpekto ang mga ginikanan sa ilang pagdisiplina sa ilang mga anak. Labaw nga dili maayong paagi ang sobrang pagpasakit sa mga bata aron sila makakaon og tagam sa ilang nahimo.

Apan kun sayop ang pagbunal ug dili maayo ang paghulga sa mga bata kung makasala, unsa ba ang maayong paagi sa pagdisiplina sa ilaha? Ang nakapait, igo lang ‘ta sa pagpasar og mga kontrobersyal nga balaunon nga mousab sa atong naandan, sa atong mga paagi ug sa atong batasan. Girespeto nato ang tinguha nga pagpanalipod sa mga bata gikan sa dagmalan nga mga ginikanan, mga yaya ug mga magtutudlo. Apan aduna bay gitudlo ang atong gobyerno unsa ang tukma ug mas epektibong paagi sa pagdisiplina sa mga bata? Ang tubag, mao nga tambag nila, istoryahon pagmaayo ang bata kabahin sa salaud nga iyang nahimo.

Kanus-a ba nahimong epektibo ang pagdili sa corporal punishment? Nagpuyo ba sa malinawon nga katilingban ang mga taga Amerika? Nahimo bang responsable ilang mga anak didto nga layo sa mga imoral nga buhat sama sa pre-marital sex, paggamit og ilegal nga drugas, pagbiay-biay sa ubang mga tawo ug pagbuhat sa nagkadaiyang krimen? Ang tubag--- wala gyud!   Ang nasud nga Amerika ang usa sa mga hingpit nga nagdili sa corporal punishment. Maisip nga buhong sila sa mga butang didto apan ang moralidad sa ilang mga kabatan-onan pabiling naglubog sa lapok.

   Itandi nato ang Pilipinas ug Amerika kung diin dinhi sa ato gitugot ang corporal punishment. Asa man ang adunay mas disiplinadong mga anak nga nahibawo nga motamod sa mga hamtong, morespeto sa mga dagko ug mahibawo nga molingi sa tabang sa ilang mga ginikanan. Wa’ magpasabot nga atong gitugotan ang mga ginikanan sa pagkastigo sa ilang mga anak nga daw kamatayon na ang ilang giatubang. Apan ang pagpasakit sa mga bata basta hatagan lang og igong pag-isplikar human sa pagpasakit moresulta sa mas epektibong pagdisiplina sa mga bata. 

Kontrobersyal ang maong balaudnon labi pa kung tan-awon nimo ang pamilya sa mga magbabalaud nga maoy nangamahan sa maong balaudnon ug mga magbabalaod nga mopabor sa maong lakang. Kumusta man ang mga kongresista ug mga senador o ang ulitawo pa nga presidente nga maoy mopaluyo sa anti-corporal punishment sa ilang koneksyon ngadto sa mga bata. Basin nagbuot buot ra ni silang tanan sa pagduso sa maong balaudnon nga wa’ na ‘sab mangunsulta sa mga ginikanan ug mismo sa mga bata.

Email: [email protected] or [email protected]