Festival

Dili gyud mawala ang mga kasaulogan sa piyesta bisan asa. Gani ning kapanahonan nato karon, anaa gyud nang mga nagkadaiyang festivals sama pananglit sa: Budbod Kabog, Panagsugod, Bonga, ug uban pa. Ang mga sayaw ingon man ang mga bisti ang nakadugang sa kamabulukon sa maong okasyon, bahala na’g taga-liog ang gasto. Sa kapanahonan sa karaang Roma, anaa ang mga festivals ug molanat kini og bulan o kaha mga bulan. Usa sa mga tumong mao ang paglingaw sa mga tawo aron pinaagi sa maong kalingawan, hikalimtan ang mga suliran nga sa tawo mibanlod.

Tinuod husto nga angayang saulogon ang kinabuhi bisan pa man sa kayano niini o sa ka-simple sa bisan unsang kasaulogan nga nagdapit kanato alang sa usa ka paghudyaka. Apan usahay ang kinabuhi brutal ug kining maong brutal nga kamatuoran ang usahay, nakapaigking sa usa ka tawo aron magsaulog. Ang uban nga wala makakita sa bili sa pagsaulog ang mohukom na lang sa paghikog aron makalingkawas sa kapaitan sa kinabuhi nila. Dili na kinahanglanon pa ang daghang gasto aron kita makasaulog. Ang mahinungdanon, nakasulod kita sa kasamtangan ug dili sa kagahapon o kaha sa ugma.