Bag-ong kahimanan sa BOC

Gipahibalo ni Atty. Ronnie Silvestre, district collector sa Bureau of Customs sa Port of Cebu ang pagka angkon sa iyang buhatan og bag-ong kahimanan alang sa pagbantay sa mga kontrabando nga mosulod sa Sugbo. Ang maong kahimanan anaa na karon sa kustodiya sa Enforcement and Security Services o ESS.

Ang CT-30 Contraband Detection Equipment nga anaa karon sa buhatan sa ESS usa kini sa tulo nga gidonar sa Amerika dinhi sa atong nasud. Ang duha ka CT-30 Contraband Detection equipment atoa usab ibutang sa Cagayan de Oro ug Zamboanga City.

Si Atty. Ronnie Silvestre miingon nga ang bag-o nilang nadawat nga kahimanan makapalig-on kini sa ilang hugot nga kampanya batok sa mosulod nga mga kontrabando. Ang ekipo nga portable aduna kini kamera nga makakita bisan sa pinakagamay nga butang sama sa shabu nga gitagoan sulod sa container van kun imo na kining isulod, busa dali ang pagtan-aw ug wa na kinahanglana pa ang paghabwa sa sulod sa mga container vans. Ang CT-30 Contraband Detection equipment dili lang kini magamit sa atong international nga pantalan kun dili magamit usab kini sa atong tugpahanan.  

Si Atty. Ronnie Silvestre nagpasalamat sa nasudnong kagamhanan kay ang Sugbo usa sa mga napilian nga butangan sa kahimanan nga alang kaniya dako kaayo og ikatabang sa ilang kampanya batok sa mga ipalusot nga mga kargamento. 

Ang bag-ong kahimanan nga naangkon sa atong Bureau of Customs dako gyod tinuoray og ikatabang sa atong kampanya batok sa mga kontrabando nga ipalusot sa pantalan dinhi sa Sugbo apan ang pagka epektibo sa bag-ong kahimanan magdepende ra gihapon sa mga naggamit niini.

Ang kahimanan nga portable adunay kamera nga makakita bisan sa pinakagamay nga butang nga gitagoan sulod sa container van apan mag-unsa man unya ang kaigmat sa mata sa kamera kun ang mata sa naggamit kaniya gitaptapan. Ang nahisgutang kahimanan mapariha ra unya kini sa X-Ray machine ni Atty. Ma. Lourdes Mangaoang nga wala gyod makakita sa hapit magduha ka libo nga container vans nga miagi sa iyang tugkaran.