Flyover walay gamit

Nagkalain-lain ang pangagpas sa katawhan niining pag-dimitir ni Senador Juan Miguel "Migs" Zubiri pagka-senador.

Ang uban ni-insister nga nasayud na daan si Zubiri nga mapildi siya sa election protest nga gi-file sa iyang kaatbang nga si Atty. Koko Pimentel. Ang uban nagtoo nga wala unta siya kinahanglana nga mo-resign samtang wala pa makahukom ang Senate Electoral Tribunal (SET) nga mao karon ang naghupot sa maong kaso.

Ako nagtoo nga usa kini ka lakang nga maayo'ng pagka-plano aron pag-ani sa simpatiya ug kalooy sa katawhan inay huwaton pa ang hukom sa SET nga magdeklarar nga grabe'ng tikas maoy nakapadaug kaniya niadtong maong piniliay.

Human niining pag-demitir ni Zubiri maka-lingkod ba si Pimentel pagka-senador? 

* * *

Dili uyon si Mayor Mike Rama ug ang pipila ka negosyante nga magtukod og dugang mga two-lane flyovers sa Cebu City.

Gusto sa mayor nga himoon ang ikaduhang Transportation Master Plan aron nga maoy mogiya sa siyudad alang sa gikinahanglang imprastraktura kalabut sa transportasyon, kadalanan ug drainage sa mosunod nga 20 ka tuig.

Tinuod nga wala maayo pagkagamit ang mga flyover nga daw mga uhong nga nanurok sa Metro Cebu. Ang nakapahimulos niini mao hinoon ang mga tawo'ng libod-suroy ingon man ang mga tulisan nga maghuwat sa ilang biktimahon sa mangitngit nga flyover.

Aron kapahimuslan ang daghang mga flyover kinahanglang hugot nga ipatuman ang anti-jaywalking ordinance aron mapugos ang mga tawo sa paggamit niini. Kinahanglan usab koralon ang ubos sa flyover aron dili gayud makalabang ang mga tawo sa dalan nga maoy sagad nilang agi-an.

Uyon ako sa mayor nga dili pa priority ang pagtukod og dugang flyover karong higayona hinonu-a angayang hatagan og dinaliang pagtagad ang pagpalapad sa kadalanan ug pag-atiman sa atong drainage system.

* * *

Gipresentar sa Korea International Cooperation Agency (KOICA) ang resulta sa ilang gihimo'ng Master Plan alang sa Mactan-Cebu International Airport nga anaa mahimutang sa Lapu-Lapu City. Ang maong pagtoon nigasto og US$1 million.

Atol sa workshop gisugyot ni Cordova Mayor Adelino Sitoy ug Kong. Tomas Osmeña nga ibalhin ang Mactan Cebu International Airport ngadto sa Cordova. Daghang mga katarungan nga giladlad ni Sitoy ug Osmeña pabor sa pagbalhin sa maong tugpahanan.

 Dili lang ko mo-komentaryo kalabut sa maong sugyot apan gi-usikan ako sa dakung salapi nga nagasto sa paghimo niining maong feasibility study.

Kun gipresentar pa unta kini sa Infrastructure Development Committee (IDC) sa Regional Development Council (RDC) nadiskutir unta kining mga options usa gihimo ang feasibility study.

Ang uban moingon nga grant kun salapi kini sa Korean government apan aduna baya kita’y counterpart niini, bisan dili kini salapi. Mao lagi kini ang resulta sa dili sihag nga kalihukan.

* * *

Nagsugod na ang pagpangita sa "The Outstanding Cebuano Award" kon TOCA. Kini mao ang ika-11 ka tuig na sa maong kalihukan. Tumong niini mao ang paghatag og pasidungog sa mga Sugbuanon nga nakatampo sa kaayuhan sa komunidad.

Ang nomination forms makuha sa buhatan ni Executive Director Engr. Greg Senining o tawga ang telepono numero 516-o115 o i-text ang cell nos. 0918-4184155 ug 0929-1305369.

* * *

Email: [email protected]