Mabuhi ang konsumidor

Matuman na gyud karong Sabado ang usa sa akong mga damgo: Ang paghugpong sa mga konsumidor aron pagpanalipod ug pagpalambo sa ilang mga katungod. Kay sa nangaging katuigan, nagdugo ang akong kasingkasing matag kadawat og reklamo gikan sa mga konsumidor nga dali ra gyud untang maatiman, ang uban di gyud gani unta mahitabo, kun ang mga konsumidor nagpakabana ug nagkahiusa pa lang.

Pormal nang manumpa karong Sabado, Agosto 6, ang unang hugpong sa mga opisyal ug mga sakop sa Consumer’s Rights for Economic Welfare Inc. (CREW), ang una ug bugtong pundok sa mga konsumidor sa Sugbo nga rehistrado sa Securities and Exchange Commission (SEC).

* * *

Si Vic Sapio, ang presidente sa CREW, nalinga na unta sa pakigbisog alang sa katungod nilang senior citizens. Apan gipul-an na tingali og paminaw sa sige nakong padungog-dungog sa senior citizens sa pagpasundayag og maayong sanglitanan sa pagbarog ug paghimo og mga lakang. Labi na ngadto sa mga batan-on nga kutob ra sa pagyawyaw apan way gihimo pagkab-ot sa ilang gitinguha nga kausaban.

Wa siya mag-inusara. Uban niya silang Jun Posas, Carmelo Samontañes, Alex Sandal, Hilda-Jane Sabang, Belinda Jayme, Minda Ocliasa, Victor Quijano, Dodie Roz ug laing kapin sa gatos ka sakop. Manumpa silang tanan atubangan ni ABS-CBN Visayas Cluster Head Tata Cinco-Sy.

* * *

Natukod ang CREW atubangan sa way kukaikog nga pagyatak sa batakang mga katungod sa mga konsumidor sa tukmang sukli, timbang ug kalidad, makiangayon nga pagtagad ug kahigayonan nga makonsulta sa di pa bunalan og usbaw sa plitehan ug mga bayranan, o pahamtangan og madaugdaugon nga mga lagda.

Matud nilang Sapio ug Roz ang pasiuna nilang proyekto mao ang pakiglambigit sa lokal nga mga opisyal aron mabadlong nang tikasan nga mga timbangan sa kamerkadohan ug mga tindahan. Malili ang kalapad sa panglantaw sa CREW sa gitukod nilang mga komitiba: Education and training; complaint handling; product testing; research and survey; ug lobbying and advocacy.

* * *

Karon pa lang may mga politiko nang nitanyag og tabang sa CREW. May senador nga nipasalig pag-abaga sa tanang gasto sa ilang induction ug pagkaon sa sinemana nilang tigom. Apan ang kinabag-an sa mga sakop nipili sa pag-amut-amot ug pagpahamtang og membership fee sa tagsa-tagsa nila aron may pundo nga maggamit sa kahugpongan.

Di ni una, ug nakaseguro kong di maoy kataposan, nga pagsuway paghugpong sa mga konsumidor. Nag-unang kahugpongan kutob ra sa induction ug ang mga nakalihok niadto nangapapas na karon. Masaaron ang kaligdong sa sinugdanan sa CREW. Naglaom ko nga manakod pa ang ilang pagpakabana. Kun gusto kang magpatakod, palihog parehistro sa di pa magsugod ang induction sa CREW sa Baseline Restaurant sa Juana Osmeña Ave. sa alas-5 sa hapon karong Sabado, Agosto 6. 

* * *

Email: [email protected]