Pagsilot o pagsabot?

Tanang testimoniya gikan sa korapsyon hangtud na sa pagpanikas, nakapuntirya ang tanan sa kanhi unang pamilya—ang mga Arroyo. Pagkasakit paminawon nga gikan sa siyam ka tuig sa pangatungdanan, mosangpot sa sunod-sunod nga mga akusasyon sa pangurakot ug pagpangilad ang tanan. Pagkasubo paminawon nga human sa mga proyektong nahimo ug mga balaod nga napasar su’d sa pangatungdanan, ang mga isyu ug kontrobersiya ang mas labing mopatigbabaw. Pagkabakikaw paminawon nga ang kadto giisip nga labing gamhanan nga pamilya karon, daw mga kriminal nga gipangitaan og tubag sa tanang akusasyon nga gibato kanila.

Apan mao ni ang kamatuoran nga angayan nga tubagon sa pamilyang Arroyo. Di’ mahimong likay-likayan lang ang tanan nga mga imbestigasyon nga gihimo karon sa gobyerno aron sa pagpatubag nila sa mga akusasyon. Di’ mahimong ilubong nalang sa limot ang tanan tunga-tunga sa atong tinguha nga maka-uswag tungod kay bisan asang anggulo tan-awon, di’ maka-irog ang atong nasud kung adunay daghang mga pangutana nga di’ matubag ug daghang mga isyu nga di’ mahatagan og linaw. Human na ang panahon nga igo nalang ‘ta sa pagpakahilom ug pagbutang nalang sa tanan sa limot. Ang labing mahinungdanon, adunay mga tawo nga manubag tungod kay sa mao lang paagi, mahimo natong malimpyohan ang daghang buling sa atong katilingban.

Wa’y planong moatubang sa imbestigasyon ang kanhi first gentleman nga si Mike Arroyo tungod kay matod sa mga doktor, di’ maayo ang kahimtang sa iyang panlawas. Mao ‘sab ni ang iyang gihimong rason sa dihang nalambigit ‘sab siya sa ZTE deal niadtong panahon pa sa administrasyon sa iyang asawa. Karon nga bag-o na ang administrasyon, susamang pasangil ra gihapon ang gibutyag sa kampo ni Mike Arroyo. Basin nakalimot sila nga bag-o na ang pamunoan ug bag-o na ang determinasyon sa gobyerno paggukod sa mga tawo nga nalambigit sa isyu sa korapsyon.

Ang nasud nga China nagplano nang magtukod og restaurant sa buwan. Ang mga nasud sama sa Malaysia, Indonesia, Thailand ug Vietnam padayon na sa ilang pagkab-ot sa hingpit nga kalambuan sa ilang ekonomiya. Apan kita dinhi sa Pilipinas, di’ gihapon nato masulbad ang naniguwang nang isyu sa korapsyon ug pagpanikas. Kini tungod kay wa’y igong determinasyon ug katakos ang miaging mga pamunoan sa hingpit nga pagsumpo niining tanan. Karon nga mao ni ang kanunay nga mogawas sa baba sa presidente, nagtuo ‘tang wa’y paglugak ang iyang kanmpanya aron hingpit nang mahatagan og hustisya ang mga Pilipino nga maoy direktang naapektuhan ug direktang biktima sa grabeng pagpangawat sa atong gobyerno ug grabeng pagpanikas nga nahitabo.

Human na ang panahon nga igo lang sa pagbutyag sa ilang mga nahibaw-an ang mga whistleblower ug human sa ilang init ug kontrobersyal nga mga testimoniya, igo lang kalimtan ang tanan tungod kay mopatigbabaw gihapon ang impluwensya sa mga tawo nga ilang gipang-akusahan. Anugon lang ang paggawas nilang Bidol, kadagkuan sa PNP, mga taga PCSO, mga opisyal sa miaging administrasyon nga maoy nibutyag sa ilang mga nahibaw-an kung kutob lang ang tanan sa imbestigasyon. Imbestigasyon nga tubagon lang og kaluoy ug pagsabot pabor sa mga tawo nga gipang-akusahan.

* * *

Email: [email protected] or [email protected]