Diay laing leksyon sa mga tag-iya og kayutaan nga wala na magtagad pagbayad sa buhis sa ilang katigayonan.
Kapin sa 13 hektareya nga yuta diha sa barangay Toong, kanait nga barangay sa Pardo, nga kaniadto gipanag-iya ni Cora K. Aguilar karon dili na iya. Unsaon nga wala man magtagad si Aguilar pagbayad sa iyang buhis.
Gisubasta kini sa dakbayan sa Sugbo kaniadtong 2007 basi lang sa kantidad sa buhis nga wala mabayri ni Aguilar. Si Joel G. Chan maoy mitanyag og labing taas nga kantidad.
Ang city treasurer’s office mi-assess sa kantidad sa maong katigayonan ni Aguilar nga dili mominus sa P1,013,740 apan gipalit ra kini ni Chan sa kantidad nga P252,333.
Unya kay gikan adtong 2007, subra na man sa usa ka tuig nga maoy gilatid sa balaud nga si Aguilar makahimo pa sa paglukat sa yuta, unya wala man niya kini mahimo, ang balaud nagkanayon nga si Chan na gayud ang tag-iya sa yuta.
Ang Cebu City Council’s committee on laws nga gipangulohan ni Konsehal Edgardo Labella mitataw nga dili na malalis nga basi sa balaud si Chan na gayud ang tag-iya sa maong 13 hektareya nga kayutaan.
Gihisgutan nako kini dinhi tungod kay daghan kaayong mga yuta nga ang mga tag-iya wala na magtagad sa pagbayad sa ilang buhisanan sa dakbayan sa Sugbo. Gusto ba kamo nga mahisama sa gidangatan sa yuta ni Aguilar? Ang City Treasurer’s Office gihatagan na og pagtugot sa konseho nga moisyu na og Final Deed of Sale sa maong yuta nga napalit ni Chan atul sa subasta kaniadtong 2007.
* * *
Saludo ko ni Ma’am Mariquita Salimbangon-Yeung kay siya ang nangulo sa “Beautify our City” sa tumong nga matabangan si Mayor Michael Rama pagpaanindot sa dakbayan.
Tiaw mo, sa wala pay Pasko monindot na kuno ang President Sergio Osmeña Sr. Boulevard gikan sa Colon Street paingon na ngadto sa Kapitolyo. Daghan kaayo ang mga magpapatigayon nga mitabang niining maong proyekto.
Nakadayeg g’yud kaayo ko kay ang ubang sakop ni Ma’am Yeung dili taga dinhi sa dakbayan sa Sugbo apan andam sila nga motabang sa pagpaanindot sa atong dakbayan. Pagkadalaygon sa ilang gihimo.
Unya kini ra ba nga mga babaye nga nagpakatakus sa pagtrabaho aron monindot ang atong Osmeña Boulevard pulos g’yud mga gwapa. Pagsulod god nako sa conference room ni Mayor Rama, abi ba nako og dunay bisita nga Miss Cebu.
First time pa usab nako nga pagkakita ni Ma’am Yeung, igsoon sa akong higala nga si Kongresista Benhur Salimbangon. Wala lagi ko makapamilok nga nagtan-aw sa iyang kaanyag. He! He!
Salamat kaayo kaninyo nga nagpakabana nga monindot ang atong dakbayan. Apan ayaw kalimot, asikasoha usab ninyo ang nakapalaksot sa atong mga aseras.
* * *
Wala g’yud ko magpanuko pag-awhag sa grupo nila ni Ma’am Yeung nga motabang usa sila pagpaanindot sa atong kasapaan dinhi sa dakbayan. Didto gud sa laing kanasuran, ang ilang sapa pagkalimpyo. Aw sumala tan-awa ang hulagway. Didto lang sa Taiwan dihang nakaadto ko, ang daplin sa ilang labayanan og basura usa ka sapa, apan pwerteng tin-awa sa tubig.
Ang ilang bukid didto sa Taipei wala g’yud maguba, dili sama dinhi sa ato nga gipahap sa Monterrazas de Cebu. Pastilan.
Didto, ang karsada gipalapos sa bukid ug nakahatag kini og dugang kanindot sa talan-awon, ilabi na kun naa ka sa taas sa Taipei 101, ang kanhi labing taas nga building sa kalibutan.