EDITORYAL - Ang truth commission

Bisan kun naaprobahan pa ang Truth Commission salikwaot lang gihapon ang iyang tahas kay naa may korte nga maoy dako og gahum sa pag-imbistigar sa mga kaso   nga giatubang sa milabay’ng administrasyon .

Unya ang tanang   mga kahiwian sa milabay’ng administrasyon, sa pagkakaron nautingkay naman kay naa may daghang tinubdan sa impormasyon nga mitumaw

Busa kun naaprobahan pa ang Truth Commission, para sa unsa naman lang ang iyang trabaho, nga kun igo lang siya sa pagsiksik og mga kahiwian sa milabay’ng administrasyon, di man siya kaimbistigar.

Ang pag-imbistigar gihimo man sa senado busa wa gyuy hustong papel ang Truth Commission sa mga kaso sa milabay’ng administrasyon ug nahug nalang kini unta og “for your eyes only”.

Kay di baya sinako ang mga kahiwian sa milabay’ng administrasyon nga lumloman sa mao untang komisyon kun naaprobahan pa kini, sulod sa pila ka tuig.

Mao bitaw tingale nga sa pagsil-ing sa mga huwes sa Supreme Court nga wa man kaayoy solidong gimbuhaton ang maong komisyon, aw dali kaayong gisalindot sa daplin.

Ang mga huwes sa labaw’ng hukmanan sa yuta dili yano nga mga   maghuhukom busa di mahimong basulon sila sa pagbasura sa maong komisyon .

Tungod tingale sa nalantawan nila nga mura lang og duplikasyon ang maong komisyon sa mga eksistido nang mga ahensya sa gobyerno ang nailhan na kaayo sa mga    trabaho nga pagsusi sa mga kahiwian    nga   nahimo sa milabay’ng Pamuno nasud. Di   ba?