Maayo ba gud ni?

Alang kanako dili maayo nga ang mga huwes magpagasto ni bisan kinsa, bisan pa og sa mga local government units, kun sila dunay mga kalihukan nga pagahimoon.

Tiaw mo nga niining labing ulahi nga gihangyo sa pipila ka huwes pagastohon ang dakbayan sa Sugbo og kapin sa P1.9 milyones sa duha ka buwag nga seminar nga adto pagahimoa sa Europe. Usahay gud ang usa ka local government unit (LGU) kun pangayoan sa mga huwes dili makabalibad kay mahadlok, ilabi kun duna kini mga kaso nga giatubang sa hukmanan.

Subra na tingali kaayo uy. Tiaw mo nga ang dakbayan sa Sugbo atul sa termino pa ni kanhi mayor Tomas R. Osmeña mipahatag og binuwan nga allowance sa matag huwes nga ang kantidad katumbas sa ilang sweldo. Unya kay ang mga huwes nagsweldo man og P35,000 ngadto sa P45,000 depende kun Municipal Trial Court in Cities (MTCC) o Regional Trial Court (RTC), ingon usab niini ang kantidad sa madawat nila nga allowance matag buwan.

Nangutana ko sa usa ka opisyal sa City Hall kun wala ba sila’y plano nga hunongon na ang paghatag sa dagko kaayo nga allowance sa mga huwes, gitubag ra ko nga kinsa man kaha ang mangunay sa paghimo niini? Sigurado usab ko nga ang mga konsehal nato nga mga abogado dili magpatuga-tuga paghimo’g lakang kabahin niini kay sila pa man gani ang mangunay sa paghimo’g mga sugyot nga hatagan og benepisyo ang mga huwes.

Kahibalo ba kamo kun ngano? Pananglit duna sila’y mga kaso nga anha masang-at sa mga sala nga gihuptan niining maong mga huwes, dili imposible nga makahangyo ra sila nga usahay hatagan og pabor kun mosumiter sila’g pleadings. Alang nako mahimo ra baya nga motabang ang City Hall sa hukmanan apan kana lang dili kaayo daku nga kantidad. Tiaw mo ang duha ka milyon ka pesos magamit na kana og para sa daghang mga proyekto.

Kaniadtong miaging buwan, may hangyo usab ang pipila ka clerk of courts nga magpagasto sila og kapin sa P200,000 alang sa usa gihapon ka seminar nga adto pagahimoa sa kaulohan.

Tan-awon nato kun unsay labok sa atong mga opisyal kabahin niini. Usbon nako, ang duha ka milyon ka pesos nga gastohon lang sa seminar sa 13 ka huwes daku na kaayo og matabang alang sa pagsulbad sa paglunop-baha sa downtown area ning dakbayan.

* * *

Wala gihapon maleksyon ang mga drayber sa mga prime mover nga magguyod og trailers nga walay rehestro. Timan-i ninyo nga kamong mga drayber ang madakpan tungod sa pagguroy nianang maong mga trailer nga “unregistered.” Siguroa ninyo nga ang trailer rehestrado, dunay plate numbers kang kansang serial numbers tukma sa serial numbers sa iyang rehestro. Unya, daghan usab nga mga sakyanan nga pasaheroan nga walay hand brake. Tambag nako, ayaw na kamo pagmaneho niini gawas kun gusto ninyo nga kamo madakpan.

Uniporme sa taksi (pagka karon) puti nga polo shirt o kaha T-shirt nga may kwelyo, ug blue ang sa mga drayber sa PUJ. Labaw sa tanan, ayaw gayud pag-sinelas nga mag-drive kay kapin sa usa ka libo ka pesos tawon ang multa ana. Public service lang ning ako kay ang mga sakop sa LTO Task Force Alpha manakop ra ba g’yud ug dili g’yud sama sa ubang mga badlongon nga enforcers nga mangwarta.