EDITORYAL - Ang pagwagtang sa korapsyon

Ang pagwagtang sa korapsyon sa nasud maoy gipangandoy sa mga tawo nga tarong og panghunahuna ug di hakog sa katigayonan nga di ilaha.

Apan sa mga tawong diskontento sa panguwarta nga tinarong lisud kaayong kapiyalan aron hingpit nga mawagtang ang korapsyon nga sa dugay nga panahon mihikog sa nasud aron magpabiling kabus hangtod-sa hangtod.

Sama sa pangandoy ni Presidente Benigno Aquino III nga wagtangon ang korapsyon nga pagwaldas sa pundo sa gobyerno nga nakapabulahan sa pipila lamang ka bulsa sa mga opisyal ra usab sa gobyerno sa milabay’ng mga administrasyon, usa ka maayong lakang.

Apan ang iyang mga sakop nga nagtuon unsaon paglighot aron makakuwarta sa buwisit nga paagi pagbitik sa pundo sa gobyerno aron   masud sa ilang bulsa, nagpaniid lamang kini sama sa usa ka bitin nga nagpaabot nga di makabantay ang tukbonon.

Dinhi sa nasud daghang mga rekurso natural nga nakapadato sa ubang kanasuran sa kalibotan, apan ang Pilipinas   nga maoy tag-iya kun may umento man, hinay kaayo .

Busa nganong hinay tungod kay naglabi ang mga kabus itandi sa mga adunahan.

Tungod niini hinay matigom ang buhis, apan luyo sa kahinay, gipangawat pa sa ubang mga opisyal, maoy hinungdan nga imbis makatuyhakaw ang nasud gikan sa iyang pagkalumos, nagpunga-punga lang gihapon sa kakabus nga lisud na kaayong lauman nga may umento pa sa panginabuhi ang kadaghanan ilabi na karong nag-anam na pagsaka ang populasyon samtang nagsukarap usab ang ekonomiya.

Si Presidente Aquino magpabilin lamang sulod sa unom ka tuig ug inighawa niya, unsa kahay mahitabo sa nasud kun ang mopuli lahi na usab og prinsipyo bahin sa pag-atiman sa katigayonan sa nasud. Di ba?