EDITORYAL - Unsaon pagsumpo sa cybersex

Unsaon man gyud diay pagsumpo niining cybersex? Usa ni ka pangutana ngadto sa mga otoridad kansang kaantigohan mao lamang ang kutob sa maabot sa panan-aw sa mga mata batok niining modernong kahimanan sa siyensya nga gigamit na sa mga dagkong krimen sa kalibotan karon.

Ang National Telecommunications Commission nagpakabana kaha sa pagsumpo ning maong matang sa krimen pinaagi sa pagmugna og kompletong monitoring system aron   pag-ila niadtong mga computer set nga gigamit sa binuang?

Ang atong mga magbabalod nga local gikan sa mga konseho sa lungsod, siyudad ug lalawigan nga kaantigo sa pamaagi sa computer, wa ba silay naumol nga balaod alang sa ilang tagsatagsa ka komunidad nga makapadasig sa mga magbabalaod sa nasud sa pagkat-on aron nga masikop kadtong mga tag-iya og computer nga mopahimulos sa kahigayonan sa pagpanapi pinaagi sa illegal nga paagi?

Si Mayor Adelino Sitoy sa Cordova, nagpakita og lakang nga nagpasabot nga naitos na ang iyang pamaagi unsaon pagdakop sa mga nagpadagan og cybersex sa iyang lungsod.

Kini tungod kay ang kinaraang   hunahuna sa tawo limitado lamang sa maabot sa atong panan-aw.

Apan eksistido na kining maong   matang sa modernong kahimanan, ug ang atong kagamhanan wa bay matawag nga contingency plan unsaon pagpakgang ang mga binuang nga mugnaon sa tawo pinaagi sa computer?

Sa law-ay nga pelikula, drama sa radio, ug sa prensa lig-on kaayo ang monitoring system sa gobyerno batok niining mga kahimanana , kumusta ang sa computer, gitun-an pa kaha o unsa ba. Di ba?