Hinaut

Karong hapon atol sa pagbukas og balik sa session sa Kongreso batbaton ni Presidente Aquino ang mga nahimo sa iyang administrasyon sulod sa usa ka tuig na ang milabay human siya mopuli sa renda sa atong gobyerno.

Apan bisan wala pa mohimo sa iyang State of the Nation Address si Aquino daghan na ang nanag-an nga way laing mamahimong unod sa iyang pakigpulong gawas sa pagpangatake kang kanhi presidente Gloria Macapagal Arroyo.

Gani usa ka obispo sa simbahang Katoliko miawhag ni Aquino'ng daan nga dili gamiton ang iyang SONA pagpangataki ni Arroyo.

Apan ang obispo daling gitatsar sa usa sa mga tigpamaba ni Aquino nga si Abegail Valte.

Matud ni Valte nga angayang paminawon una ang SONA ni Aquino usa manaway ang iyang mga kritiko.

Husto si Valte angayang paminawon una ang SONA ni Aquino usa sawayon.

Pero angayang masayod sab si Valte sa kalainan sa pagpanaway ug sa unsolicited advice. Ang gihimo sa obispo dili man pagpanaway kun dili advice ngadto sa Presidente nga unta dili matinuod ang kabalaka sa kadaghanan nga ang iyang SONA way mamahimong kalainan sa nangagi niyang mga pakigpulong diin pulos pangataki ni Arroyo ang iyang gihimo.

Dili nimo mabasol ang publiko kun sila napul-an na sa way kinutoban nga pagbasol sa niaging administrasyon.

Igo na ang pagpanulisok sa miaging pamunoan panahon na nga ipakita ni Aquino ang direksiyon sa iyang gipanghambog nga tuwid na daan.

Dili na kinahanglang iyang batbaton pagbalik ang mga anomaliya sa iyang gisundan nga pamunoan tungod kay way usa nga molupyo sa nasud ta ang wala masayod unsa ka kurakot ang kanhi administrasyon.

Angayang hinumduman ni Aquino nga wala siya pilia nga presidente aron tigpahinumdom sa katawhan matag higayon nga siya modiskurso sa mga anomaliya sa niaging administrasyon.

Gipili siya sa katawhan tungod kay nagtuo sila nga siya maoy tubag sa gipangandoy nga maayong panggobyerno sa atong nasud.

Busa ako moduyog sa daghang mga nanghinaut nga unta ang SONA ni Aquino karong hapon maghatag gyud sa tinuod nga kahimtang sa atong nasud.

Hinaut nga dili niya ganoyon ang huna-huna sa publiko ngadto sa giiingong pagpanikas ni Arroyo sa eleksiyon labi pa sa pagtumaw ni kanhi Maguindanao election supervisor Lintang Bedol ug sa pamahayag ni Zaldy Ampatuan aron pagtabon sa kapakyas sa iyang pamunoan pagtuman sa iyang saad atol sa kampanya.

* * *

[email protected]