Gidayeg nako ang pamaagi ni Cebu City police director Melvin Ramon Buenafe sa pagpaminus kon dili man gayud hingpit nga masumpo ang mga krimen dinhi sa dakbayan.
Ang gipasabot nako mao ang gitawag og “PAPA-LAB Project” ni Koronel Buenafe diin ang mga libudsuroy nga kabataan nga sagad makahimo og krimen iyang imbitahon diha sa lainlaing police stations unya hatagan og pagkaon.
Ang PAPA-LAB nagkahulogan nga “Panggaon, Amumahan Para dili mahimong Labad ug Badlongon.”
Human makakaon ang kabataan, patan-awon na usab sila’g salida aron malingaw. Dayon pakigsultihan sila ni Buenafe nga dili gayud maayo ang paghimo og mga krimen. Gituyo ni Buenafe nga ang kabataan naa sa kapolisan panahon sa gabii kay aron dili sila makahimo’g krimen.
Karon ang pangutana mao kini. Asa man og kwarta si Buenafe ang iyang mga sakop aron matag adlaw makapakaon sila sa mga libudsuroy nga kabataan? Gipasabot ko ni Buenafe nga sayon ra kaayo kana kun ang tanang kapolisan o katawhan dinhi sa dakbayan moabag lang. Ang pagpakaon sa kapin sa 100 ka kabataan nga naglibudsuroy sa lainlaing dapit dili mogasto og P1,000.
Matud ni Buenafe nga kun ang matag usa sa kapolisan nga ania madistino sa dakbayan moamot lang og P1 matag adlaw makapakaon na sila sa libudsuroy nga kabataan ug nagpasabot nga maibanan nila ang krimen nga manghitabo.
Pila ra man gud tuod ang P1 ba. Kun mopadala gani kita og text message sa atong mga higala, usahay tubagon lang nato og “K” unya ipadala balik sa sender. Sa usa lang ka pagpindot sa keypad sa cellphone, nakagasto na kita og usa ka peso.
Tungod sa gihimo sa kapolisan nga pag-amoma ug pagpabatyag sa kabataang libudsuroy nga sila gipangga diay sa mga polis, nausab ang ilang batasan. Kaniadto, ang mga bata nga libudsuroy kun makakita’g polis managan.
Karon ang mga bata nga libudsuroy moduol pa sa patrol car sa kapolisan ug mangutana kun asa ang dapit nga dunay “feeding program” si Buenafe. Sa ato pa, giisip na nila ang kapolisan nga ilang higala. Sa ingon nga paagi, hinay-hinay na sila nga mobiya unya sa ilang bisyo.
Ang sunod niini mao ang pagpatungha sa maong mga libudsuroy nga kabataan. Hain na man ang Community Scouts sa dakbayan? Kining mga bata kun imo lang amomahan dili sila badlongon sa katilingban.
Kuhai ninyo og pagtulon-an ang higala nako nga polis. Usa siya kaniadto sa mga bata nga giamoma sa community scouts. May uban pa nga nakahuman sa pagtungha ug nahimo na nga mga professionals.
Nalipay si Buenafe kay daghan na kaayo ang mipadayag nga motabang sa iyang programa pag-amoma sa libudsuroy nga kabataan isip paagi sa pag-agni kanila nga magtinarong na.
Unsaon man gud ang mga ginikanan niining mga bataa maayo lang mohimo’g bata apan wala masayod sa ilang responsibilidad.
Kining mga ginikanan nga walay tagad sa ilang mga anak, pastilan angay g’yud nga pasakaan sila’g kaso. Kun kuwang pa ang balaud nga gilatid sa Presidential Decree 603 nga giamendar sa Republic Act 7610, angay’ng himoan pa og dugang ngipon aron silotan kining mga ginikanan nga kusog kaayo magbuhat og anak apan dili moatiman.
Ang uban dili magtagad nga makatungha ang ilang anak. Dili usab sila malooy nga inig-abot sa tingkaon walay makaon sa ilang mga anak. Dili kaagwanta, layas ang bata.