Luok sa labor

Nawani sa pagsaulog sa mga mamumuo sa giisip nilang pasiunang kadaogan sa pagdeklarar nga may igong sukaranan ang pagpausbaw sa suholan sa Sugbo ug Central Visayas ang pait nga kamatuoran: Ang bisan unsang usbaw sa suholan, kun duna man, mapatuman unya na sa Septiyembre, tangkod nga usa ka tuig human sa kataposang uminto sa suholan.

 Sa ato pa, dakong usik-usik sa panahon ang langay nga pagpangita sa mga sakop sa Regional Tripartite Wages and Productivity Board (RTWPB 7) og supervening condition. Unya sa Septiyembre wa na kinahanglana ang supervening condition, kay gawasnon nang RTWPB pagsubli ug pagpausbaw sa suholan sa mga anak sa singot sa Sugbo, Bohol, Negros Oriental ug Siquijor.

* * *

Basaha ni ug panghuy-ab. Ang deklarasyon sa supervening condition ipada pa sa RTWPB 7 ngadto sa National Wages and Productivity Commission (NWPC). Kun dasonan sa NWPC, ipada na sab pagbalik sa RTWPB 7 alang sa publikasyon. Magpaabot pa gyod ang RTWPB 7 og 15 ka adlaw una makapahigayon og laing hugna sa konsultasyon sa rehiyon.

 Nga labing sayo nga masugdan sa unang semana na sa Agosto. Ang konsultasyon maabtan og pila na sab ka semana. Ang bisan unsang resulta sa konsultasyon lalisan pa sa mga sakop sa RTWPB 7. Nga mahimong siyam-siyaman, kuyaw nga lapas na sa Septiyembre, una makatino pilay ihatag nga usbaw.

* * *

 Laing nataligam-an: Nahukman na sa RTWPB 7 sa botong 3-2 nga dunay supervening condition niadtong Mayo 12 ning tuiga. Apan ang abogado sa RTWPB 7 nga si Glenn Tabon niinsistir nga gikinahanglan ang upat-ka-boto nga mayoriya ug nangayo og katin-awan gikan sa NWPC.

 Human sa usa ka semana, ang RTWPB 7 nisubli sa botasyon ug nagtabla, 3-3. Maong gihimo ang konsultasyon pagsusi sa ekonomikanhong kahimtang sa mga lalawigan. Apan karong bag-o nideklarar ang NWPC nga balido ang tulo-ka-boto nga mayoriya.

 Sa ato pa, sayop si Tabon, balido ang deklarasyon sa supervening condition niadtong Mayo 12, hagbay ra untang natakda ug nadawat na unta rong uminto sa suholan.

* * *

Sama sa naandan, ang mga mamumuo maoy na-syut sa taro. Nalangay na pag-ayo, imposible pa gyod nga makuha ang ilang gidemanda nga P100 ngadto sa P120 nga usbaw sa suholan.

 Ang regional wage boards gitukod sa Kongreso aron nga mas paspas ug mas makiangayon nga masubli ang suholan sa mga mamumuo. Apan salamat sa katalawan ni RTWPB 7 Chairman Exequiel Sarcauga, sa pagpalabi nilang DTI 7 Director Asteria Caberte ug Neda 7 Director Marlene Rodriguez sa ilang opinyon kay sa mga numerong nahipos sa ilang buhatan, sa kahakog sa mga representante sa mga negosyante ug sa pagkabuak-buak sa mga mamumuo, ang wage boards mao na hinuoy babag sa makiangayong pag-apud-apod sa bunga sa produksiyon. 

* * *

Email: [email protected]