Nahadlok sa mga obispo

Daghan ang nakamatikod nga wala kaayo’y singgit, insulto ug kasaba atol sa Senate inquiry mahitungod sa paghatag sa Philippine Charity Sweepstake Office og mga sport utility vehicles ngadto sa mga obispo sa simbahang Katoliko panahon sa administrasyon ni Gloria Arroyo.

Kini tungod ba kaha kay mahadlok ang mga senador nga mo-resbak unya ang simbahan? Daghan ang miingon nga nahawngan ang mga senador sa mga obispo atol sa maong imbestigasyon.

Gamhanan ug inpluwensiyado kaayo ang simbahan. Ug sa akong tan-aw dili gusto kining mga senador nga makompromiso ang ilang political career kun ilang kastigohon ang mga obispo.

Lahi ang maong inquiry sa ubang imbestigasyon nga gipahigayon sa Senado. Sa una man gud puro insulto ug kasaba ang madawat niadtong mga ipatawag sa mga senador.

Naandan na kini nilang buhaton sa ilang pagpahigayon og mga hearing. Tungod lagi kay aduna silay police power, agresibo kaayo kining maong mga senador pag-imbestigar sa halos tanan nga mga dagkong kontrobersiya nga gikalambigitan sa Arroyo administration.

Halos mawad-an na sa dignidad kadtong mga isala sa mga imbestigasyon sa Senado. Kini tungod kay halos hukasan sila sa ilang pagkatawo atubangan sa mga senador nga mora’g lion nga makabanghag.

Ang pagpakamatay ni kanhi defense secretary Angelo Reyes maoy ehemplo kun unsa ka kuyaw ang imbestigasyon diha sa Senado. Ang dili makaagwanta sa mga insulto ug kasaba pildi gayud. Hinungdan nga adunay maghikog sama sa gibuhat sa kanhi Armed Forces chief.

Apan niadtong Miyerkules, milurang ang tunada sulod sa Senado. Si Senador Jinggoy Estrada, nga puwerte nakalatigo ni Reyes sa inquiry kaniadto, puwerteng na man hinuong hinaya nga nakapangutana sa mga obispo.  

Daghan hinuon ang nakamatikod nga mora’g nahawngan ang mga senador sa presensiya sa mga obispo. O kaha mas dako sila’g respito sa mga halangdong opisyal sa simbahan kay sa mga nangaging dinapit kinsa nawad-an na sa dungog human sa ilang pagbisita sa Senado.

Hinuon, sa ako nang giingon, grabe ka gamhanan ang simbahan. Ug siguro nakita sa mga senador nga pildi sila kun ang hait nga dila maoy ilang gamiton pagpangutana sa mga obispo.

Siguro kun nag-inisog pa ang mga prinsipe sa estado atol sa mao’ng imbestigasyon, sigurado nga mabati ilang imahe sa mga Katoliko. Ug pildi sila nianang paagiha, ilabina nga grabe silang mopahumot sa simbahan alang sa suporta niini panahon sa piniliay.    

Apan mao lagi, kun mga ordinaryong tawo pa kadtong mga dinapit, dila ray walay labod nila. Nag-una na unta si Estrada paglapdos sa mga bisita aron pagtuhik na usab sa nakalabay’ng rehimen.

Ug dinhi atong makita nga klarong adunay pinili ang mga senador sa ilang pagtratar sa mga dinapit atol sa ilang mga hearing. Karon, dili sila gustong mopahit sa mga obispo. Kini tungod kay mahadlok silang ma-blacklisted sa simbahan ug boykoton unya sa mga Katoliko sa sunod nga piniliay.

Daghan ang nag-atang sa imbestigasyon sa mga senador sa mga obispo. Apan ang tanan pulos nadismaya. Naghinam-hinam kita pagsaksi og alegre nga sirkus, apan hilom ug sagrado pa sa misa ang tunada sa mga aktor sa Senado.

* * *

Email: [email protected]