Ang hulagway nga gipakita ni Jesus ang nagpaila kun unsang matang sa kinaiya ang gihuptan sa mga tawo kaniadto. Kun diha sa banay masunod mo ang katigayonan o panginabuhi, masunod mo usab ang mga kaaway sa imong banay. Mao nga sa maong kultura matud pa ni John Pilch, hisabtan gyud ang gihimong paghulagway ni Jesus.
Ang yawa mao ang kaaway nga misabod sa mga sagbot kuyog sa mga binhi. Apan bisan pa niini, ang Dios nibuot nga dili una pangibton ang mga sagbot ug pasagdan lang kini motubo uban sa mga trigo. Kini gumikan sa praktikalidad. Kay dunay dakong posibilidad nga sa paghimo sa ingon, maangin ang mga trigo. Hulaton lang una ang hustong panahon sa ting-ani una pa pangibton ang tanan. Ang trigo ibutang sa kamalig ug ang sagbot pundokon aron dauban.
Mismo sa atong personal nga panaw sa kinabuhi anaa uban kanato ang mga trigo ug mga sagbot nga nidungan pagtubo sulod nato. Apan ang Dios ang mitugot nga sila mabuhi aron mamahimong kabahin sa atong pagkatawo. Apan sa Diosnong panahon ang tawo mahingpit gikan sa mga sagbot sa iyang kinabuhi. Ang magpabilin mao ang trigo sa iyang kinabuhi. Ang magpabilin mao ang trigo sa iyang pagkatinubos.