Labaw kay sa iskandalo nga namugna sa pagdawat sa mga Obispo og sakyanan nga pinalit gikan sa pundo sa Philippine Charity Sweepstakes Office mas iskandaloso alang nako ang nahimong tubag ni Butuan Bishop Juan De Dios Pueblos sa usa sa mga pangutana ni Senador Jinggoy Estrada.
Atol sa pag-atubang sa mga Obispo nga nalambigit sa kontrobersiya didto sa hearing sa Senate Blue Ribbon Committee niadtong Miyerkules, si Pueblos gipangutana ni Estrada kun modawat ba siya og hinabang gikan ni Satanas?
Agi og tubag sa pangutana, si Pueblos mikutlo sa pamahayag kaniadto ni anhing Jaime Cardinal Sin nga nagkanayon nga kun alang sa kaayohan sa mga kabus iyang dawaton ang hinabang bisan pa kun kini gikan sa demonyo.
Ang maong tubag para nako mas iskandaloso pa kay sa iyang pagdawat og kwarta nga gipalit sa iyang Mitsubishi Montero gikan sa PCSO. Kini tungod kay posibling maghatag ni og sayop nga mensahi ngadto sa publiko labi pa sa mga sakop sa simbahang Katoliko.
Alang nako baliko nga pagtulon-an sa moralidad ang iyang gihatag ngadto sa katawhan niini. Sa Ethics dunay giingon nga “the end does not justify the means.” Buot ipasabot nga bisan pa og nagbunga og maayo ang paghimo sa usa ka butang dautan wala ni makatu-is sa kamatuoran ug mag-abswelto sa mihimo sa usa ka dautang buhat.
Kun atong uyonan ang pamahayag ni Pueblos sama ra nga niingon siya nga dili sayop ang pagpanulis basta ang kita sa usa ka tulisan gamiton aron pagtabang sa mga kabus. O bien mahimo ra ang pagpamaligya og drugas basta ang halin itabang sa mga pobre.
Gikan sa usa ka Obispo labihan ka iskandaloso sa maong pamahayag. Nisantop hinuon sa akong huna-huna nga ang lintunganay diay sa tanang gihimo sa simbahan mao ang kwarta.
Wala diay bali sa simbahan bisan kun gikan sa immoral o illegal ang kwarta nga ilang dawaton basta lang gamiton ni nila alang sa mga pobre. Sa ato pa supak man ang simbahan sa pagpasar sa Reproductive Health Bill kun tabunan sila og suborno sa mga pharmaceutical companies nga tigbuhat og mga contraceptives uyon na sila niini?
Si Pueblos usa ka alagad sa Ginoo, apan tungod sa iyang pamahayag tataw nga siya magtuman sa kabubut-on sa Ginoo. Ang Biblia nag-ingon diha sa 1Peter 1:15-16, “Hinunoa, pagkinabuhi kamo nga balaan ingon nga balaan ang Dios nga nagtawag kaninyo. 16 Ang kasulatan nag-ingon, “Pagbalaan kamo kay ako balaan man.”
Ang laing birsikulo sa Biblia diha sa 2 Corinto 5:17 kini nag-ingon, “Kay bisan kinsa nga nahiusa kang Kristo, bag-o na siyang binuhat; ang daan miagi na, ug miabot na ang bag-o.”
Apan daw wala man masubay sa pagtulon-an nga Kristohanon ang iyang gipanulti atubangan sa Senado.
* * *