Ang abuso sa intelligence fund

Ang pundo alang sa pagpaniid gikinahanglan alang sa maayong pagpangalagad ngadto sa katawhan. Alang sa seguridad sa katawhan ug ilang kabtangan ang atong militar ug kaposilan gigahinan sa gitawag og intelligence fund aron magamit sa pagpaniid sa kalihokan sa mga badlungon sa katilingban. Tungod sa pagkamahinungdanon sa pundo wala gani itugot ang pag-audit niini. Apan ang pagkadili subject sa audit sa pundo mao usab ang nakapahimugso sa abuso sa mga abusado nga nagpadagan sa rinda sa kagamhanan.

Sama sa kagamhanan ni kanhi pangulong Gloria Macapagal Arroyo nga mihimong rason sa intelligence fund sa pagpagawas sa salapi o kuwarta sa Philippine Charity Sweepstakes Office o PCSO.

Sigun sa pamahayag sa kanhi general manager sa PCSO, Rosario Uriarte nga sulod sa tulo ka tuig ang iyang buhatan mipagawas og 325 milyones ka pesos aron ibutang sa intelligence fund diin ang 160 milyones ka pesos niini ang gipagawas sa miaging tuig 2010. Ang pagpagawas sa pundo ubos kini sa pagmando ug pagtugot ni kanhi pangulong Gloria Macapagal Arroyo.   

Ang Philippine Charity Sweepstakes Office nagkabuang sa ilang pundo tungod sa giingong binilyon nga utang nga gibilin ni Rosario Uriarte ug mga kaubanan maayo gani kay makatahan pa sila sa mga nakadaug sa lotto. Ang pundo sa PCSO nga para unta sa charity nga katuyoan gigamit sa politika pinaagi sa pagpasangil sa intelligence fund.

Karon ang Senado naghimo og pakisusi sa giwaldas nga pundo sa PCSO diin ang tumong ug tuyo mao unya ang paghimo og balaudnon nga makapanalipod ug makapalikay sa mao gihapong tinunto nga nasinati sa PCSO. Pero kun ang kasamtangang administrasyon dili lang moabuso sa iyang gahom wala na seguro kinahanglana pa ang balaudnon nga pagaumulon sa Senado.

* * *

I-uli sa mga obispo nga nalambigit sa kontrobersiya sa pundo sa PCSO ang mga mahalong sakyanan nga ilang nadawat ug gigamit alang sa kalihokan sa ilang simbahan. Gani gidala nang daan sa obispo sa Luzon ang mga sakyanan nga ilang nadawat gikan sa PCSO ug giparada na kining daan sa gawas nga bahin sa buhatan sa kongreso ug nagpaabot na lamang sa modawat niini nga representante gikan sa gobyerno. Ang ubang obispo nag-andam na usab sa pagpadala pagbalik sa mga sakyanan nga ilang nadawat. Kining tanan ilang gihimo aron maalim ang samad nga gibilin sa kontrobersiya.

Ang kontrobersiya nga nalambigitan sa 7 ka mga obispo sa atong simbahang katoliko nakapakat-on kaha nila ug sa ila pang mga kaubanan?