Ang Ciudad project

Ang kagamhanan sa dakbayan sa Sugbo way puas sa pagsabwag sa mga maayong kasayoran ngadto sa gawas bahin sa kaanindot ug katahom ning dakbayan nga sakar kaayo sa panginahanglan sa mga maglingawlingaw nga mga turista sa kalibotan.

Mao man gani nga tanang investor lokal man o taga gawas gidapit nga mobubo og puhonan sa negosyo dinhi aron nga labing makapasamot sa kaanindot sa palibot ug labaw sa tanan labing mohatag og dugang kinitaan sa dakbayan

Sa mga tukorong establisemento sa mga hilit ug suok nga lugar o kaha sa kadaplinan sa highway sa dapit sa Banilad wala himoang isyu sa kagamhanan sa dakbayan ang suliran sa trapiko.

Kini tungod kay ang kahuot sa trapiko daan nang suliran apan nasulbad ra sa maayong sistema nga gisagop sa mga tinugyanan sa trapiko.

Pero dihang gisugyot nga tukoron ang usa ka proyekto nga gitawag nga Ciudad Project sa Banilad, gibabagan kini sa kagamhanan tungod sa isyu sa trapiko sa Banilad-Talamban area.

Busa sakit palandungon sa usa ka investor nga hingtungdan ug nasud-ong usab sa publiko ang di patas nga tratamento sa mga opisyal sa kagamhanan sa mga gipabarog nga balay patigayon sa maong dapit

Kini tungod kay samtang ang uban gitugotan ra, apan ang uban gibabagan, busa natataw nga pamolitika ang hinungdan ug di tinarong nga pagsilbi sa katawhan. Kay ang tinuod, ang kahuot sa dagan sa mga sakyanan, naggumikan sa kagamay sa karsada, unya nganong di man ang karsada maoy padak-an?

Dinhi natataw ang hinakog nga kinaiya sa mga politiko nga ang gilantaw mao ra ang ilang kapretso bisan kun lumalabay lamang sila, ug wa respetohi ang katungod sa mga tawo nga maoy angay mopahimus sa mga proyekto sama sa Ciudad Project.   Di   ba?