Talawan
Milabay na ang pila ka adlaw human nahiagom sa "boksidor" nga mayor sa Davao ang usa ka court sheriff nga igo lang nagtuman sa iyang trabaho, apan hangtud ron wa gyuy gihimo ang huwis nga maoy nagsugo sa demolisyon.
Ang huwis maoy miluwat sa demolition order nga gipatuman ni sheriff Andres Abe dihang gikulata siya ni Davao City Mayor Sarah Duterte wa lay gihimo aron protehian ang integridad sa korte nga maoy tinud-anay nga giatake sa mayor.
Ang huwis labaw sa tanan mao untay nanalipod sa sheriff pinaagi sa pag-cite kang Duterte og contempt.
Apan hangtud karon wala gyuy gihimo ang huwis. Hinuon gipasagdan niini ang sheriff nga gitabangan na sa tibuok pamilya sa mayor.
Ang pobre nga sheriff nga nakamatikod nga hastang iyang agawon nitalaw nga ikabangga ang gikaintapang pamilya sa Davao mao pay nangayo og pasaylo bisan siya’y biktima.
Kun ingon niini ang buhaton sa tanang huwis nga dili mobarog aron protehian ang integridad sa hukmanan nabalaka ko nga ang gihimo ni Duterte mahimong sundon sa ubang barumbado nga mga opisyal.
Kalisud og sa umaabot nga mga higayon dili na respitohan sa mga gamhanang politiko ang mando sa korte ug ang mga warlord na maoy maghari.
Angayang di palabyon sa korte suprema ang pagpasagad sa huwis. Alang nako nagpakita ni sa iyang gross incompetence. Asa ka mangita og huwis nga bisan klaro na nga wala respetuhi ang iyang kamanduan wa lay gihimo.
Way luna sa atong hudikatura ang mga huwis nga talawan. Unsaon man niya pagpatuman sa hustisya kun sa mga gamhanang politiko mobahag ang iyang ikog?
Busa maayong disiplinahon sa labaw'ng hukmanan ang mga huwis nga talawan.
Alang kang Duterte maayong ipahamtang sa Department of the Interior and Local Government ang labing bug-at nga silot.
Samtang tinuod hari ug intap ang mga tawo sa ilang liderato didto sa Davao apan dili mahimong mas labaw pa sila kay sa hukmanan.
* * *
- Latest
- Trending
