EDITORYAL - Ang birthday gift

Ang birthday gift butang nga kinasingkasing gasa gikan sa usa ka tawo nga nagmahal sa nagsaulog sa iyang birthday.

Usa ka boluntaryong hatag tungod kay miila siya sa tawo nga iyang gihatagan.

Sa tawong hamtong og pangisip wa maghunahuna og unsa mang gasa gikan sa iyang mga minahal sa kinabuhi, higala, paryente , o kinsa mang kauban sa kapunongan nga mohatag kaniya og gasa sa panahon sa kasaulogan sa iyang birthday.

Mas malipay siyang modawat sa usa ka gasa nga surprise o dayag nga gihatag kaniya ilabi na kun gikan sa mga tawong inila nga wala niya dahoma nga mahinumdom kaniya panahon sa iyang birthday.

Ang sayon kaayong molitok nga mangayo siya og birthday gift mao kadtong mga bata pa.

Di sila mauwaw ug sayon kaayo nilang litukon ang pagpangayo og gasa gikan sa iyang mga tiyo ug tiya, nga nangugos kaniya ug bisan kinsa nga ganahan niyang pangayoan nga gaan kaayong sabton sa gipangayoan tungod kay bata siya.

Apan ang hamtong nga mag-birthday, salikwaot kaayo ug di normal ang pagpangayo og birthday gift tungod kay may delikadesa kini.

Labaw sa tanan puwerting abnormala sa usa ka tawo nga mangayo pa og birthday gift, labaw sa tanan mao pay mosita sa klase sa birthday gift nga iyang imandar nga ihatag kaniya sa iyang birthday gikan sa iyang gipangayoan.

Ngil-ad kaayo kun ikaw usa ka yano nga tawong mohimo sa ingon niini, apan mas labing ngil-ad kun dako kang opisyal sa kapunongang sibika, o relihiyoso, unsa may ikasulti sa imong mga sakop kanimo.   Di   ba?