Sa pagbukas sa Senate Blue Ribbon Committee sa ilang imbistigasyon, nagkalapad ang mga timailhan sa grabing pagwaldas ug pagpangurakot sa pundo sa Philippine Charity Sweepstakes Office atol sa miaging administrasyon.
Bisan unsaon og pangulipas sa mga opisyal sa miaging pamunoan dayag ug tataw ang kamatuoran sa pag-usik-usik sa pundo sa PCSO nga angayan lang unta nga gamiton pagtabang sa mga kabus.
Inay itabang sa daghang himatyon nga mga pasyente sa nagkadaiyang mga tambalanan nga nagpaabot bisan dyutay nga limos, maoy gipalabi sa mga way konsensiya nga mga opisyal sa PCSO ang pagpamalit og mahalon nga mga sakyanan aron ihatag sa mga obispo ug kaparian nga loyal sa miaging administrasyon.
Samtang nakontento lang intawon ang mga kabus sa sensiyo nga ilang madawat isip hinabang sa PCSO ang mga opisyal sa maong ahensiya ug ang ubang opisyal sa gobyerno way katagbawan nga nagpahimulos sa pundo.
Usa ka kanhi advertising executive sa PCSO nga si Manuel Garcia pananglitan, gibana-bana nga moabot gyud sa P1.5 bilyones ang pundo nga iyang nakurakot gikan sa mga advertising contracts nga iyang giduso alang sa approval sa PCSO board.
Si Garcia giingong mipaburot gikan sa 20 ngadto sa 40 porsiyento sa tanang kontrata sa advertisement.
Ang labing iskandaloso mao ang pagpanghatag sa PCSO og sakyanan sa mga obispo ug kaparian tungod kay gawas nga dako ning supak sa atong Batakang Balaud, ang simbahan mismo dunay kaugalingong lagda nga nagdili sa mga obispo ug kaparian nga mangayo ug modawat og regalo gikan sa kita sa sugal.
Ang Constitution hugtanong nagdili paggasto sa pundo sa gobyerno alang sa bisan unsa nga sekta kun relihiyon. Kini pinasubay sa prinsipyo sa panagbuwag sa Simbahan ug sa Estado.
Mamahimo lang gamiton ang kwarta sa gobyerno alang sa pari ug obispo kun sila nagserbisyo sa gobyerno sama pananglit sa mga pari nga nagsilbi nga mga chaplain sa kapolisan ug militar.
Ang mga sakop sa Senado misugyot nga aron pagsulbad sa problema gikinahanglan ang pagrepaso sa kaugalingong charter sa PCSO. Kini aron kapugngan ang umaabot nga higayon sa pagwaldas sa kwarta sa gobyerno.
Basi sa mga opisyal sa PCSO nga mokabat sa P100 bilyones ang ilang projected income sa mosunod nga lima ka tuig. Kun dili mausab ang sistema sa pagpangurakot diha sa maong ahensiya dako ang kahigayonan nga mausik lang sab ang maong pundo.
Usa sa mga gikinahanglan kaayong irepaso nga probiso sa Charter sa PCSO mao ang pagpugong nga magamit isip gatasan sa Malakanyang ang maong ahensiya.
* * *