EDITORYAL - Separation of church and state

Si kanhi Presidente Gloria Arroyo murag   inanag nga giligid-ligid sa mga baga sa nagkadaiyang kaso ug mga pasangil nga may labot sa mga anomalusong transaksyon sa siya pay presidente sa nasud.

Usa niini ang giingong pagtugot niyang maggasto ang kuwarta sa Philippine Charity Sweepstakes Office (PCSO) ngadto sa di angayang gastohan niini.

Nalambigit ang giingong unom ka mga Obispo sa simbahang Katoliko nga kuno gipanghatagan niya og tagsa-tagsa ka Pajero, sa kuwarta nga kinitaan sa PCSO, unya nakalapas kuno sa balaod kalabot sa “separation of church and state”.

Sa mga opisyal sa kagamhanan nga naa sa maong pundok relihiyoso, di makalikay nga motuman ka sa mga lagda ug reglamento sa simbahan kumo kay sakop ka diha.

Sa Biblia, gisugo ang tanan nga magpasakop sa kagamhanan, apan kun ikaw lider sa kagamhanan di usab ka kalikay nga ang imong pagkatawo uban ang imong katungdanan motahod ka usab sa lider sa imong relihiyon.

Kumo kay dako kang lider sa gobyerno, di kalikayang ang lider nimo sa simbahan mangayo kanimo og pabor kumo   kay nasayud siyang sayon kaayo nimong ikahatag kaniya ang iyang kapretso. Apan ang usa ka maayong lider sa relihiyon, una mangayo ug modawat sa mga butang gikan sa mga lider sa gobyerno, may delikadesa ug mangonsulta pa sa iyang mga sakop kun kanang butanga di ba makadaot sa dungog sa ilang pundok.

Unya kaantigo usab maniid kun ang gihatag gikan ba gyud sa bulsa sa politiko , ug di ba gikan sa laing tinubdan nga magkuwestiyon kaniya ugma damlag kay nasayud siya nga ang kaulawan sa iyang sakop nga naghatag kaniya sa maong butang kaulawan usab niya ug sa iyang simbahan.

Apan ang tinuod nga lider sa relihiyon, di kayoan sa mga politiko kay nasayud siya nga kun iya kanang buhaton ang boto sa iyang mga sakop paninglon sa panahon sa eleksyon. Di ba ?