Lunop sa downtown

Gibalik-balik na nako pag-ingon nga ang pagpalawom sa Estero Parian, kanang sapa nga milagpas ilawom sa mga commercial establishments diha sa downtown area, mao ang makasulbad sa problema sa lunop diha sa maong dapit.

Pirmi nako kini nga gireport, gisuwat sa lindog sa pamantalaan, ug gireport sa radyo, apan subo lang nga daghan pa ang wala kaayo makasabot sa isyu. Dili nako sila mabasol kay wala man sila masuheto sa maong dapit. Tingali, kinahanglan pa sila nga pasabton pag-ayo o kaha dad-on sa maong lugar aron ipasabut g’yud pag-ayo ang sitwasyon. Kagahapon, duna ko’y tawo nga gidala nako didto sa maong dapit ug gipasabut pag-ayo ang maong isyu.

Gikataw-an ko sa kauban kong reporter nga si Allan Mahait sa GMA-DYSS kay mora kuno ko’g taga city engineer nga personal g’yud nga miadto ug misusi sa sapa.

Alang gud nako, kanunay ko nga mohimo og ocular inspection sa mga dapit nga malambigit og isyu aron nga kridible ko nga mohimo’g opinyon. Kini maoy rason nga managsama kami og argumento sa mga city engineers.

Ang among opisina sa THE FREEMAN ug BANAT NEWS anaa ra duol sa maong sapa mao nga suheto kaayo ko. Naobserbahan nako nga mata’g higayon nga dunay baha, ang tubig nga gikan sa sapa mosugwak ngadto sa drainage systems sa karsada.

Balit-ad kini kay ang husto mao nga ang tubig gikan sa karsada suyopon sa drainage system ug adto moagas sa sapa. Nabali ang sitwasyon kay ang Estero Parian mabaw na kaayo. Dugay ra kaayo ko nga nagyawyaw nga angay’ng paladman ang atong mga sapa, apan lahi og baruganan kaniadto ang atong mga opisyal.

Sa Estero Parian, kanang sapa nga milagbas sa ilawom sa Colonade Mall, Dimsum Break, Gaisano Main, duha na lang ka dangaw ang nahabilin ug mosugwak na ang tubig.

Sa kilid nianang duha na lang ka dangaw nga nahabilin sa sapa, anaa ang “exit hole” sa drainage system nga anha unta moagos ang tubig. Kun puno na ang sapa sa tubig-baha, ang tubig moagi dinhi ug mobugwak ngadto sa karsada.

Kini maoy rason ngano nga kun may baha dali ra kaayo nga maglunop ang Manalili Street, D. Jakosalem Street ug ubang karsada sa downtown area. Timan-i, ang tubig nga gikan sa barangay Kamagayan nga anha moagi sa Junquera, anha usab moipon sa Estero Parian.

Ang maong sapa paingon na ngadto sa dagat nga nahimutang tungod sa barangay Tinago, puno na kaayo sa mga lapok. Kinahanglan g’yud nga dalion sa City Hall ang pagpalawom sa maong sapa. Nasabtan na ba ninyo?

* * *

Atensyon sa mga otoridad, apil ang mga opisyal sa barangay Lahug. Nganong wala man kamo’y gihimo nianang daghan kaayong mga “drug addicts” nga wala nay kukahadlok nga anha na mag-injection og drugas duol sa skywalk atubangan sa Lahug Elementary School?

Ayaw ko’g ingna nga wala kamo masayud niini unya ako nga dili taga Lahug nasayud? Kun ingon man gani niini ang sitwasyon, makapanglingo-lingo ko kay masabot nga kuwang diay mo’g intelligence network. Aw na hala, karon nga nasayud na kamo, panid-i ang maong lugar duol sa skywalk ilabi na panahon sa hapon ug himoi og diha-diha nga operation. Kining mga tawhana angay nga tudloan og leksyon.

Nagduda ko nga ang atong mga tanod nasayud niini apan wala lang magtagad kay nahadlok sa mga adik.