Ang kalikopan ug hustisya

Gisaway sa mga environmentalist ang pagtambong ug pagsubo ni Pangulong Noynoy Aquino sa 200mw nga power plant sa Kepco sa Colon, Naga City sa nakalabay nga adlaw tungod kay matud pa nila daghan og nahimong kalapasan ang nahisgutang kompanya sa balaud sa kalikopan nga nakahatag og peligro sa kinabuhi sa mga tawo. Apan gisumbalik sila ni Pangulong Aquino. Matud pa sa pangulo, gusto ba diay sa mga mahigugmaon sa kalikopan nga makasinati og kuwang nga supply sa koryente ang Sugbo ug ang mga kasikbit niining mga lalawigan? Matud pa sa pangulo nga gikinahanglan kaayo sa negosyo ang supply sa koryente ug ang giisang mga kabalaka sa mga environmentalist sayon ra kining maalibyohan o masulosyonan.

Sakto si Pangulong Aquino sa iyang giingon nga gikinahanglan sa negosyo ang supply sa koryente alang sa pagpalambo sa ekonomiya aron makatabang kini sa katawhan. Apan unsaon man unya paglambo sa negosyo ug paglambo sa ekonomiya kun patay na simbako lang ang katawhan gumikan kay nangalipong ug nangasakit sa itom kaayong aso nga gibuga sa panghaw sa planta sa Kepco?

Samtang dili ikalimod nga gikinahanglan gayod nato ang paglambo, dili upod seguro nato kalimtan ang atong responsibilidad sa pagpanalipod sa atong kalikopan. Sa kalamboan dili nato ikompromiso ang kalikopan kay mag unsa man ang kalamboan kun wala nay makapahimulos niini.           

* * *

Upat ka bag-ong saksi ang mitunga sa kasong Visconde massacre ug misulti nga sila nasayod nga dinhi ra sa nasud si Hubert Webb sa dihang nahitabo ang krimin mga 20 ka tuig na ang nakalabay. Ang ilang gisulti sukwahi sa giingon ni Hubert Webb nga didto siya sa Amerika sa pagkahitabo sa krimin. Apan mao gihapong saksi ang miingon nga wa sila makakita ni Hubert Webb nga didto sa panimalay sa mga Visconde sa pagkahitabo sa krimin.

Wala silay pulos nga saksi ug dili angay nga ikalipay ni Lauro Visconde ang pagtunga ning maong mga saksi tungod kay samtang ila man tuod nga kapamatud-an nga dinhi ra sa Pilipinas si Hubert Webb pagkahitabo sa krimin apan dili nila kapamatud-an nga si Hubert ang naghimo sa krimin. Gawas pa niini, dili na usab mapasakaan pagbalik og kaso si Hubert sa kamatayon sa tulo ka mga Visconde tungod sa prinsipyo nga Double Jeopardy.