Hoopsdome launching sa Lapulapu City

Maayong tinud-on sa pagsusi ni Senador Miguel Zubiri ang pagbalhin sa hepe sa Customs Police Division sa Bureau of Customs Port of Cebu.

Si Capt. Jerry Arizabal gihugonhugonan nga ibalhin sa Davao tungod sa pagbalibad niya ug sa iyang mga tawo pagdawat sa tanyag nga P2 milyones nga suborno bugti sa pag-release sa sinakong mga black corals nga ilang nasakmit samtang paingon na unta ipalusot sa gawas sa nasud.

Angay usab imbestigahon aron ilhon kinsa ang opisyal sa Bureau of Customs sa Port of Cebu nga maoy mitanyag kang Arizabal sa P2 milyones.

Kining maong opisyal nga hepe og usa ka buhatan sa BOC-Cebu kalit lamang nawala sa puwerto human malampusong nalutsan og warrant of seizure and detention (WSD) ang maong mga black corals nga nagkantidad og P15 milyones.

Apan usa ka semana human sa iyang pagkahanaw, migawas ang balita gikan sa Manila nga si Capt. Arizabal ilisan na ni Capt. Isidro Estrera kinsa moretiro sa Hulyo sunod tuig.

Hinuon misaad man si Zubiri atol sa iyang pag-inspeksiyon sa Eye Center sa Vicente Sotto Memorial Medical Center nga iyang pangutan-on ang mga opisyal sa BOC ini’g balik sa Senate hearing sa pagpalusot sa mga black corals, nganong nahitabo ang pagrelibo kang Arizabal sa iyang pagbalibad sa P2 milyones.

Ingon gyud diay kadako kining sindikato sa black corals tungod kay aduna diay kini koneksiyon sa sulod sa Bureau of Customs.

Ato usab awhagon ang mga senador ug mga opisyal sa BOC sa pag-ila kinsa kining opisyal sa BOC-Cebu nga maoy miduol kang Capt. Arizabal aron subornohan unta og P2 milyones.

Hasta usab ang mga sakop ni Arizabal nga sila si Special Agents II Rico Mongaya ug Andie Catre, ug Special Agent I Jeffrey Alindogan gikatahong mibalibad usab sa tanyag nga suborno.

Nakagawas na ra ba sa gawas sa nasud ang mga negosyanteng gikatahong maoy nagpalusot og mga black corals ug mga nagkadaiyang marine species ngadto sa gawas sa nasud.

Kun gukdon kining magtiayon nga nalambigit niining black coral syndicate, angay usab gukdon sa mga senador ug sa mga opisyal sa customs sa paggukod sa sakop o mga sakop nga nahimong koneksiyon sa maong sindikato.

* * *

Ang kaanindot sa matag tuig nga Sinulog mardi gras hapit na malupigan sa mga kasaulogan sa dakbayan sa Lapulapu.

Mga 20 mil ka mga tawo – mga Oponganon ug mga bisita – nalingaw kaayo sa fireworks display sa Mactan Channel duol sa Marcelo Fernan Bridge.

Ang Facebook account sa Lapulapu gisulong og mga batan-on ug wala makaagwanta sa pagkomentaryo sa ilang obserbasyon kalabot sa kasamtangang isla sa Mactan karon.

Miuyon ko sa obserbasyon sa mga batan-on nga ang dakbayan sa Sugbo malupigan na kun hisgutan lang ang mga kalingawan.

Sa pagsugod sa ika-50 nga Charter day sa dakbayan sa Lapulapu gihimo ang Rampada, usa kini ka bag-ong konsepto sa street-dancing.

Apan wala mohunong ang kagamhanan sa dakbayan sa Lapulapu sa street-dancing lamang. Karong Hulyo 9, himuon ang “Bayle sa Isla” sa Olango islands.

Sumala pa sa akong nadunggan nga sirad-an ang mga karsada sa mga isla sa Olango aron ipahigayon ang bayle.

Atol sa bayle himuon usab ang Rampada apan adto na sa isla.

Apan sa dili pa ang Hulyo 9, himuon ang launching sa Hoopsdome karong Hulyo 2.

Ang Hoopsdome nga nagkantidad og P300 milyones usa kini ka sports arena nga adunay 5,000 sitting capacity ug fully-airconditioned pa gyud, unya ang mga lingkoranan niini mga “ergonomics” pa gyud.

Si Kongresista Manny Pacquiao, sumala sa akong nadunggan, mohimo og concert atol sa Hoopsdome launching. Sa Hulyo 23, himuon sa Lapulapu ang Pinoy Pride 7 sa Ala Boxing Stable.

Mga dagkong hotel sa Mactan ug mga locators sa MEPZA nga mitabang sa kagamhanan pagpatuman sa mga programa pasidunggan karong Hulyo 24.

Ang kaabtik sa usa ka batan-ong konsehal sa dakbayan, Harry Radaza ug pagka development-minded ni Mayor Paz Radaza ug banang si Kongresista Arturo Radaza maoy hinungdan niining tanan.

Natayming kini sa pagkadestino sa “idol” nako nga police chief sa Lapulapu City Police Office nga si Supt. Michael Anthony “Sensei” Obenza.