Binuang sa NFA rice importation quota (2)

Kun nagtuo kita nga sinsero ang administrasyong Aquino sa kampanya batok korupsiyon, mura’g nasayop kita.

Dinha sa National Food Authority (NFA) halapad kaayo ang korupsiyon pinaagi sa bag-ong polisiya pagtugot sa mga magpapatigayon bisan dili mag-uuma nga maka-import og bugas humay.

Kaniadto, ang importer nga nakakuha og quota gikan sa NFA, magbayad sa gobyerno og P100 kada sako. Apan, dili lang kay kana ra. Ang importer nagbayad og P20 kada sako ngadto sa NFA.

Ang P100 maoy resibohan, samtang ang P20 walay resibo, nga sa ato pa, maoy “for the boys” sa mga opisyal sa NFA.

Usa ka importer nga atong nahinabi nagkanayon nga ang P20 matag sako, bahinon sa mga opisyal sa NFA ug dako-dakong bahin moadto deretso sa Malacañang.

Apan sa dihang milingkod si Lito Banayo isip hepe sa NFA sa administrasyong Aquino, ang P100 matag sako nga buhis sa gobyerno nga gipaagi og bond wala gihapon mausab.

Ang nausab mao ang P20 kaniadto sa administrasyong Arroyo, karon nahimo nang P80 matag sako.

Pananglit adunay 100,000 ka sako sa usa ka semana nga importasyon, ang P80 matag sako nga “for the boys” sa pamunoan ni Banayo moabot og P8 milyones.

Asa man kini paingon?

Ngadto kaha ni Pres. Noynoy Aquino sa Malacañang?

Dili lang kay kini lamang ang atong concern tungod kay ang mga importer, dili na mga mag-uuma kun dili mga Filipino-Chinese nga magpapatigayon.

Ang nakaparat lang, ang mga Fil-Chinese nga magpapatigayon nga gitugotan nga makagamit sa NFA pag-import og mga bugas taga-Manila.

Usa sa magpapatigayon nga nanag-iya og dakong “night bar” sa kauluhan nga nalista isip “campaign contributor” ni Noynoy niadtong miaging tuig nga eleksiyon maoy adunay labing dakong quota gikan sa NFA.

Dili makiangayon kining pagpanghatag og quota sa NFA tungod kay ang mga dagkong magpapatigayon gikan sa kauluhan maoy gihatagan og dakong quota sa magkalainlaing probinsiya gawas sa Manila.

Dinhi sa Cebu lamang, usa ka magpapatigayon nga nailhan nako sa ngalan nga “D. Tan” maoy dako kaayo og quota sa NFA ug maoy gitugotan nga maka-import og bugas humay dinhi.

Kun magpapatigayon ang tugotan maka-import og humay, nganong dili man ang lokal nga mga magpapatigayon?

Hapit na ko motuo nga si Tan, kinsa tag-iya og dakong imnanan sa kauluhan, gitugotan nga maka-negosyo gamit ang NFA iyawat makabayad ang kampo ni Aquino sa iyang kontribusyon sa miaging presidential election.

Sa Cebu gihapon, aduna hinuoy Fil-Chinese nga buhong usab sa NFA quota. Sama kang “D. Tan”, kining maong Insik sa Sugbo adunay negosyong mga imnanan.

Taym pa, unsaon man diay ning atong presidente? Nganong aduna man kini koneksiyon sa mga tag-iya og imnanan?

Pangutana lang kining ato ha. Walay suk-anay.

Laing Fil-Chinese nga nagtangag sa apilyedong Osmeña nabulahan usab niining kurakot nga eskema sa NFA. Apan, mao lagi, kining maong Insik kanunay’ng nanghimakak, dala ang panghambog aduna siyay koneksiyon sa Samar group sa administrasyong Aquino.

Maayo tingaleng awhagon nato ang mga grupo sa Liberal Party dinhi sa Sugbo sa pagsusi niining mga ngalan nga nalambigit sa “legal” nga paagi sa rice smuggling.

Asa naman silang Atty. Augusto Go ug Atty. Democrito Barcenas nga mga dagko sa Liberal party dinhi sa Sugbo?

Tingale, si kanhi Konsehal Junjun Davide makatabang nato sa pagdala ning maong impormasyon ngadto sa Malacañang.

Dili maayong paminawon ang balita nga ang Aquino administration hugot nga naggukod kang kanhi Pres. Gloria Arroyo, unya ang iyang mga sakop sa NFA ug mga campaign contributor labaw usab diay’ng nangurakot ginamit ang importasyon sa bugas pinaagi sa NFA.

Hinuon, adunay dakong kalahian tungod kay sa Tag-P20 matag sako sa miaging Arroyo administration, karon tag-P80 na. Sa ato pa, ni-mahal na ang “for the boys” karon nga si Noynoy Aquino na atong presidente ug si Lito Banayo ang hepe diha sa NFA!

Kitang mga tawo maoy demalas. Kita ra ang giilad nila.