US di molaban sa Pilipinas

Nag-anam ka talandugon ang isyu bahin sa Spratly Islands karong gipangandoy na sa kagamhanan sa nasud ang puwersa militar sa Amerika sa higayong atakehon sa China ang mainland sa Pilipinas o kaha ang mga isla nga gipangangkon niini sa Spratly.

Ang China may igo nang puwersa militar nga ikasukol batok ni kinsa mang nasud nga makiggubat niini.

Gituohan nga kining tension sa Spratly masulbad lamang kining malinawon kun biyaan sa Pilipinas ang 50 kapin ka mga isla nga gipanag-iya niini sa maong lugar.

Kay sa higayong moinsister kini nga manag-iya unya mosuway og panghilabot sa mga tinubdan sa asayte nga anaa sa ilawom sa kadagatan sa maong lugar , di kini lung-an sa China paglutos hangtod nga mosilaob ang kagubot.

Apan ang nakapait kay ang gisaligan sa Pilipinas nga puwersa sa Amerika, way kasiguroan tungod kay pintok na nga mibalibad ang US nga di sila manginlabot niining panagbangi karon tali sa Pilipinas ug China bahin sa Spratly.

Angay masayran sa tanan nga ang Mutual Defense Treaty tali sa Pilipinas ug Amerika nagmando nga maglinabanay ang duha ka nasud sa higayong atakehon kini og kontra nilang taga –gawas.

Apan dihang nadunggan sa mga kadagkoan sa Amerika ang pagtuki sa Pilipinas ning maong kasabotan karong gihulga na kini sa China , pintok kaayong gisalindot sa Amerika ang maong tratado nga nagpasabot lang nga di sila modapig sa Pilipinas kun ang kontra niini mao ang China.

Malagmit gumikan sa 45 bilyones ka dolyar nga gibubo sa China para makabangon ang ekonomiya sa Amerika gikan sa pagkalusno niini niadtong miaging tuig. Di ba?