Kinahanglang ilisan si Obenza

Sa miaging semana gipatay si Fernando Villanueva Canillo sulod sa iyang panimalay sa Barangay Babag II sa dakbayan sa Lapu-lapu. Si Canillo gihulagway ni Sr. Supt. Anthony Obenza, hepe sa kapolisan sa dakbayan sa Lapu-lapu nga kanhi sakop sa Kuratong Baleleng apan mitiwalag ug naghimo og iyang grupo. Si Fernando Villanueva Canillo nga nailhan usab sa alyas nga Bruno Villanueva gihulagway ni Obenza nga kauban sa mitulis sa mga alahas nga nagkantidad og minilyon nga gipanag-iya sa MLhuillier Pawnshop samtang gibiyahi kini patabok sa taytayan sa Mactan.

Gawas kang Canillo giapil usab sa pagpatay ang iyang live-in partner nga si Emma ug ang tulo pa ka tuig nga anak samtang samdan ug nadala sa tambalanan ang igsoon ni Emma nga si Ricric. Ang upat ug unom pa ka tuig nga anak nila ni Fernando Canillo ug Emma nakatago ug maoy buhing saksi sa krimin nga nahitabo.

Giila sa mga minor de edad nga anak ni Canillo si Uncle Kambal nga nailhan sa pangalang Ric Cadavero nga maoy namusil sa ilang ginikanan ug uyoan. Giingon sa mga police nga kauban ni Canillo sa pagpanulis si Ric Cadavero ug ang dili maayong pagkabahin sa ilang tinulisan ang rason nganong gipatay si Canillo sa iya ra usab nga kauban. Si Cadavero ug ang laing duha niya ka kauban nga wala pa mailhi gipasakaan na og kasong multiple murder ug frustrated murder. 

Kung wa unaya og patay sa iyang mga kauban si Canillo, asawa ug anak dili unta masayod ang mga police sa dakbayan sa Lapu-lapu nga anaa ra diay sa ilang tugkaran magpuyo ang ilang giingon nga tulisan. Ang kapolisan sa Lapu-lapu nga gipangulohan ni Obenza klaro kaayo nga wala maglihok sa pagpangita sa mga tulisan nga mitulis sa minilyon nga alas sa MLhuillier.

Human mapasaka ang kaso wala na usay laraw ang mga police sa Lapu-lapu nga mangita kang Cadavero nga lagmit sa pagkakaron nagpalamig ug nagpaabot lang sa tukmang panahon aron makapanulis. Busa mintras tanto nga dili pa kaayo daghan ang namuyong tulisan sa dakbayan sa Lapu-lapu ug mintras tanto nga wala pay laing dagkong tulis nga nahitabo, akong awhagon si Mayor Paz Radaza sa paghulip ni Anthony Obenza isip hepe sa kapolisan sa dakbayan sa Lapu-lapu kay bisan hapit na pikti ang iyang ilong sa tulisan wala gyod siya makakita niini.