Di man tingale angayan pang pangayoan og menteryohan bisan si kinsang politiko dinhi sa Sugbo sa mga tawong di Katoliko.
Kay ang pagpatukod og menteryo dinhi dili sayon nga buhaton, kay gani may mga menteryo nga iya sa mga negosyante nga di pangrelihiyon supakon pa gani ni sa mga tawong lahi og kinabuhi kay sa taga Lorega ug taga Carreta, ning siyudad.
Kay ang taga Lorega ug taga Carreta mas lig-on og gininhawa kay sa ubang mga molupyo ning siyudad kinsa mangurog kun padul-an og menteryo ang ilang balay sa kabalaka nga mamatay sila.
Apan wa ta niana, di maayo para sa mga pundok relihiyoso nga moyangungo og unsa mang pabor ni kinsa mang politiko kay una sa tanan mura lang og imong gibaligya ang imong mga sakop nianang mga tawhana.
Nga sa panahong makautang ka og kabubut-on niana, bisan pa og mabulit sila sa mga anomalusong buhat mapugos ka sa pagbotar sa panahon sa eleksyon kumo kay nakautang ka og kabubut-on kanila.
Kun ang uban kanila adunay pasalig, paminawa lang og palutsa sa pikas dunggan kay ang ubang mga politiko usahay may estoryang tinarong, apan usahay maglabi ang botbot.
Bahin sa menteryo, wa man gani magproblema ang ubang miyembro sa di Katoliko didto sa kalungsoran nga sa panahong mamatay magbayong sa minatay mura og isdang dubok padong ngadto sa tag pila ka kilometrong menteryo publiko kay lagi di sila ipalubong sa menteryo Katoliko nga duol unta sa ilang lugar.
Pero adunay menteryo nga kaugalingon sa di Katoliko diha sa sitio Tapon, barangay Putat, lungsod sa Tuburan, gipasagdan ang tanang mamatay nga makalubong way bayad, kay sa pagkatinuod ang magpunay og kamatay hapit kada adlaw kadto ra mang mga miyembro usab sa labing dakong grupo nga relihiyon. Di ba?