EDITORYAL - Classroom dakong problema

Padayong gikagubtan karon sa nasud ang nagtubo nga gidaghanon sa mga estudyante samtang walay yuta ug mga edipisyong kahimoan sa ilang klase adlaw-adlaw.

Di man kini   kahibudngan kay nasayud na ang tanan nga matag tuig nagkadaghan ang mga bata nga matawo busa nagkadaghan usab ang moeskuyla.

Sama ra man kini sa atong kadalanan dinhi sa dakbayan nga sa sinugdan dyutay pa ang sakyanan, busa gagmay kaayo ang karsada, ug dihang midaghan na dako kaayo ang gasto sa pagpalapad sa mga karsada aron kaagian sa nagdaghang mga sakyanan.

Ang mga pork barrel sa mga kongresista dako kaayo og papel sa pagpalapad sa mga kadalanan ug ang DPWH igo lang sa pagsuperbisar sa pagtrabaho niini.

Bisan tuod og may gahin usab ang DPWH sa ilang mga proyekto sa kadalanan, apan giabagan gihapon sa mga kongresista ang pggasto sa mga karsada nga gitawag nga provincial road ug municipal road lakip na ang barangay road.

Gawas sa mga national road kansang gahin naggikan na gyud mismo sa pundo nga iya sa nasudnong kagamhanan nga gipiyal ngadto sa DPWH.

Ingon usab niini ang problema sa mga edipisyo sa eskuylanan, nga walay laing unang mogama og maayong plano alang sa edukasyon sa mga lungsoranon kundi ang mga lokal nga opisyal sa lungsod nga pangunahan sa ilang mayor.

Sila ang mga otoridad sa lungsod nga unang mangita og paagi nga makakaplag og yuta nga katukoran og eskuylahan.

Ang bahin sa galastohan, ang bright nga mayor kaantigo mamarayeg sa iyang gobernador ug sa kongresista nga nagsakop sa iyang lungsod.

Busa tungod kay ang edukasyon usa man sa nag-unang panginahanglan sa mga katawhan sa lungsod, di kalikay ang mga lokal nga opisyal sa pag-atiman niini ug ang DepEd igo nalang sa pagsuperbisar ug sa pag-edukar sa mga kabataan tungod kay ang pagtudlo mao may dakong tahas nila.   Diba?