Garbo ni P-Noy

Ang 7.9 nga porsiyento nga gisaka sa gross domestic product sa miaging tunga sa tuig, bag-ong administrasyon ang nigawas nga rason ni Presidente Noynoy Aquino dihang gipangutana unsa ka tinuod nga adunay kagubot nga nahitabo tali sa iyang mga cabinet members. Matod sa presidente, imposible nga makab-ot ang maong kalampusan kung nagkatibulaag ang iyang mga sakop. Gipasigarbo sa bag-ong administrasyon nga nakab-ot ang kalampusan sa paglig-on sa ekonomiya ug pagpadayag og interes sa mga negosyante tungod sa nagkahiusa ug lig-on nga sakop sa iyang administrasyon.

Apan di’ ang pagsaka sa GDP ang tinuod nga unod sa pakigpulong ni P-Noy sa mga sakop sa media sa miaging adlaw. Ang iyang gipasigarbo mao ang iyang bag-ong gitudlo nga kalihim sa Dept. of Transportation and Communication nga si kanhi senador ug iyang running mate nga si Mar Roxas. Kung si P-Noy ang paminawon, si Roxas ang solusyon sa bag-o lang natay-og nga ahensya tungod sa kalit nga pag-resign ni kalihim Jose De Jesus. Usa si de Jesus sa mga sinaligan sa administrasyon sa iyang inahan kaniadto ug girespeto sa mga haligi sa gobyerno tungod sa kaligdong niini sa iyang katungdanan su’d sa halos 30 ka tuig sa gobyerno.

Gawas nga si Roxas ang iyang nahimong running mate nga andam kanunay sa pagsugal sa iyang kinabuhi sa karera sa politika, si Roxas ‘sab ang matawag nga bag-ong Kristo nga nisugal sa iyang ambisyon ug damgo nga mamahimong presidente sa nasud tungod ug alang sa kandidatura sa iyang igso. Human sa halos usa ka tuig sa katungdanan, ang panahon nga gitagal una matudlo sa bag-ong posisyon ang usa ka naparot nga kandidato, panahon na aron himuon ni P-Noy ang labing gipaabot nga bawos sa iyang labing suod nga kauban sa politika. Ang pangutana karon, giandam ba ang maong posisyon alang ni Roxas o nagtunong lang nga mao ni ang bakanteng pwesto karong mga panahon nga kinahanglan nang i-plastada ang iyang running mate?

Garbo ni P-Noy si Roxas. Tataw ni atol sa iyang pakigpulong atol sa pormal niyang pagpaila sa labing bag-ong sakop sa iyang gabinite. Bilib ang presidente ni Roxas nga giisip niyang makahatag og katumanan sa mga pangandoy sa nasud nga mamahimong world class kung ang kaniadto sa tugpahanan, pantalan ug transport system ang hisgutan. Gibasehan sa presidente ang mga maayong nabuhat ni Roxas dihang kini pa ang nangulo sa departamento sa negosyo o patigayon. Ang kalampusan ni Roxas isip Mr. Palengke sa DTI maoy nagbukas sa mas lapad pa nga pultahan sa pulitika.

May igong kapasikaran si P-Noy nga ipasigarbo si Roxas tungod kay natudlo ning amahan sa business process outsourcing o BPO. Karon, malaumon ang administrasyong Aquino nga mopakita sa iyang susamang labok ang bag-ong natudlo nga si Roxas. Apan ang tinuod nga garbo wa’ magsandig sa mga unsay mahimo nga kabag-ohan ni Roxas sa departamento nga iyang huptan. Apan anaa sa mamahimong kalampusan sa paggukod sa mga tawo nga nakasapi o naka-benepisyo sa giingong anomalusong NBN-ZTE deal nga giisip nga usa sa dakong bulilyaso sa miaging administrasyon. Hangtud nga wa’y mga tawo nga masilotan tungod sa kontrobersyal nga deal, di’ ‘ta makaingon nga dakong garbo si Roxas sa administrasyon ni P-Noy.

Email: [email protected] or [email protected].