LTO fixer nanambling

Kinsa ba kining usa ka Winard or Wingwing nga giingong fixer sa Land Transportation Office (LTO) diha sa Natalio Bacalso Avenue?

Kining maong fixer gireklamo ni Durinda Macasocol, ang assistant chief sa City Health Surveillance and Statistics Unit, kay gibiktima ang iyang anak nga nadakpan sa paglapas sa lagda sa tukmang pagmaneho og sakyanan.

Awhagon nako si LTO-7 regional director Raul Aguilos o kaha si LTO-7 assistant regional director Arnel Tancinco nga himoi kini og diha-diha nga aksyon.

Ayaw na g’yud tuguti nga kining maong tawo maka-standby diha sa LTO premises. Makadaut kana sa dungog sa LTO. Inigkabasa nimo niini Winard, pangita’g paagi nga magkita ta ug ipasabot kini’g maayo.

Ingon niini ang estorya. Ang anak ni Durinda nga si Jhed Martin Macasocol nadakpan sa mga sakop sa LTO Task Force Alpha didto sa Talamban kay nagmaneho og motor nga walay helmet. Ang batan-on nga si Jhed, miadto sa LTO aron lukaton ang iyang lisensya. Giduol siya og tawo nga nagpaila nga Winard ug giingnan siya nga ang multa sa madakpan nga magmotor nga dili mag-helmet, P1,778.

Kay wala lagi masuheto, gihatag niya ang P2,000 ngadto ni Winard kay nagtoo siya nga taga LTO kini nga motabang niya paglukat sa lisensya. Apan wala na gayud mobalik.

Mireport na lang si Jhed sa iyang Mama. Miadto si Durinda sa LTO ug nahimamat g’yud nila si Winard apan miingon kini nga ang kwarta tua na sa iyang asawa.

Unsa ka gud Winard? Nganong ang kwarta nga gihatag kanimo paglukat sa lisensya gihatag man nimo sa imong asawa? Ingon ba niana ang imong panginabuhian? binuang?

Wala ka mauwaw nga ang imong pamilya pakan-on nimo gikan sa kwarta nga nakuha sa binuang? Matag anha nako diha sa LTO, magsurok g’yud ang akong dugo nga magtan-aw kaninyo kay nasayud ko nga dunay uban kaninyo nga kusog kaayo “manambling.”

Tambling ang termino kun ang usa ka fixer mosibat sa kwarta nga ibayad unta alang sa usa ka dukomento.

Palihug Sir Aguilos ug Sir Arnel, aksyoni kining maong reklamo. Kinahanglang bisan anino niining Winard dili na makit-an diha sa LTO.

Sayud baya mo nako nga maayo g’yud kaayo kong tawo apan dili ko malisang niadtong mga nalambigit sa binuang. Wala man gani ko manghilabot ninyo nga manginabuhi diha apan itambling man hinoon ninyo ang gibayad.

Unya, mireklamo usab si Durinda kay usa ka polis nga si PO3 Nelson G. Jaime nga nadistino sa Cebu City Traffic Group nga nahimutang luyo ra sa LTO, mipasalig nga iyang pik-apon kini si Winard nga naila usab nga Wingwing apan duha ka semana na lang, wala makatuman.

Gipangayoan ra ni PO3 Jaime si Durinda og P1,778 kay maoy multa sa wala pagsul-ob og helmet apan walay resibo nga gihatag. Duna ra ba’y uban diha sa mga kawani sa LTO nga bilyako kaayo.

Ang ilang pangwarta kaniadto, ambot og nagsigi pa ba karon, mao nga magtunga ra sila sa kwarta ug ang fixer unya i-release ang lisensya apan ang multa magpabilin ra gihapon sa computer.

Kun ang sama nga drayber madakpan pag-usab, doble na ang iyang mabayran.

* * *

Bisan og deputized agent ko sa LTO apan dili gayud ako magpanuko sa pagsaway kun dunay sawayonon diha sa maong ahensya. Misulod ko pagka deputized agent sa LTO nga walay sweldo aron makatabang pagpitol sa mga abusadong drayber apan kun dunay binuang numero uno ko nga mosaway.